આવતીકાલથી ગુજરાતમાં નવરાત્રીનો પ્રારંભ થઈ રહ્યો છે. ખેલૈયાઓની સુરક્ષા માટે ગુજરાત પોલીસે વલસાડ સહિત દક્ષિણ ગુજરાતમાં ખાસ આયોજન કર્યું છે. રેન્જ IG પ્રેમ વીર સિંહે આ અંગે માહિતી આપી હતી. નવરાત્રી દરમિયાન તમામ ગરબા સ્થળોએ પોલીસનો બંદોબસ્ત રહેશે. પોલીસ સતત પેટ્રોલીંગ કરશે. ભીડ અને ટ્રાફિક વ્યવસ્થા જાળવવા માટે પણ પોલીસ સજ્જ છે. આ વ્યવસ્થામાં શી (SHE) ટીમ, ખાનગી વેશમાં પોલીસ કર્મચારીઓ અને પેટ્રોલિંગ ટીમ કાર્યરત રહેશે. મહિલાઓની સુરક્ષા માટે 112 હેલ્પલાઇન પણ શરૂ કરાઈ છે. જો રાત્રે ગરબા રમીને પરત ફરતી મહિલાઓને વાહનની તકલીફ પડે, તો તેઓ 112 પર ફોન કરી શકે છે. પોલીસ વાન તાત્કાલિક મદદ પહોંચાડી તેમને સુરક્ષિત ઘરે પહોંચાડશે. કોઈપણ વ્યક્તિને મુશ્કેલી જણાય તો 112 નંબર પર અથવા સ્થાનિક પોલીસનો સંપર્ક કરી શકે છે. ગુજરાત પોલીસે સૌને સુરક્ષિત નવરાત્રીની શુભકામનાઓ પાઠવી છે.