સુરતની સ્પેશિયલ પોક્સો અદાલતે 14 વર્ષીય સગા સંબંધમાં આવતી નાબાલિકા સાથે વારંવાર દુષ્કર્મ આચરવાના ગંભીર ગુનામાં 21 વર્ષીય રિક્ષાચાલકને 20 વર્ષની સખત કેદની સજા ફટકારી છે. આ કેસની વિગત મુજબ, સપ્ટેમ્બર 2023 દરમિયાન કાપોદ્રા પોલીસ સ્ટેશન વિસ્તારમાં રહેતી અને ધોરણ-9માં અભ્યાસ કરતી વિદ્યાર્થીનીને આરોપીએ લગ્નની લાલચ આપી પોતાના ઘરે બોલાવી શારીરિક શોષણ કર્યું હતું. આ મામલે ઓક્ટોબર 2023માં કાપોદ્રા પોલીસ મથકે ફરિયાદ નોંધાઈ હતી. પોલીસ કાર્યવાહી અને કોર્ટ ટ્રાયલ
ગુનો આચર્યા બાદ આરોપી લાંબો સમય નાસતો ફરતો રહ્યો હતો, જેની માર્ચ 2025માં પોલીસે ધરપકડ કરી હતી. કેસની સુનાવણી દરમિયાન સરકારી વકીલ વી. એલ. ફાળદુની દલીલો, પીડિતાનું નિવેદન, શાળાનું બોનાફાઇડ સર્ટિફિકેટ તેમજ મેડિકલ પુરાવાઓને આધારે સ્પેશિયલ અદાલતે આરોપીને તમામ આરોપો હેઠળ દોષિત ઠેરવ્યો હતો. પીડિતાને વળતર અને દંડનો આદેશ
અદાલતે આરોપીને સખત કેદની સજા ઉપરાંત રૂ. 50,000નો દંડ ફટકાર્યો છે, જે રકમ સીધી પીડિતાને ચૂકવવાનો નિર્દેશ આપ્યો છે. આ સાથે જ ‘ગુજરાત વિક્ટિમ કોમ્પેન્સેશન સ્કીમ-2019’ હેઠળ પીડિતાને રૂ. 4,00,000નું વધારાનું વળતર ચૂકવવાનો પણ કોર્ટે મહત્વપૂર્ણ હુકમ કર્યો છે.