ઇઝરાયલી વડાપ્રધાન બેન્જામિન નેતન્યાહૂએ ગુરુવારે સંયુક્ત રાષ્ટ્ર મહાસભામાં ભાષણ આપ્યું. જેમ જ તેઓ મંચ પર આવ્યા, ત્યારે અનેક દેશોના પ્રતિનિધિઓએ હૂટિંગ કરીને તેમનો વિરોધ શરૂ કર્યો અને બહાર જવા લાગ્યા. આ દરમિયાન નેતન્યાહૂ લગભગ 3 મિનિટ સુધી શાંત રહ્યા. પછી તેમણે કહ્યું, ભાષણ શરૂ કરતા પહેલાં હું કહેવા માગું છું કે જો અહીં કોઈ અન્ય કાયર વ્યક્તિ હોય તો તે અહીંથી બહાર જતી રહે. જોકે આ દરમિયાન ગેલેરી નેતન્યાહૂના સમર્થકોથી ભરેલી હતી. તેમણે તાળીઓ વગાડીને વડાપ્રધાનનું સ્વાગત કર્યું અને ‘અમ યિસરાઇલ ચાઈ’ એટલે કે ‘ઇઝરાયલની જનતા જીવંત છે’ના નારા લગાવ્યા. નેતન્યાહૂએ પોતાના ભાષણમાં ગાઝા, ઈરાન અને લેબનાન પર ઇઝરાયલ દ્વારા કરવામાં આવેલી કાર્યવાહીની ચર્ચા કરી. ગાઝા- ઇઝરાયેલી સેનાના હુમલાનો બચાવ નેતન્યાહૂએ 7 ઑક્ટોબર 2023ના હુમલાનો ઉલ્લેખ કરતા ઇઝરાયેલની સૈન્ય કાર્યવાહીને યોગ્ય ઠેરવી. તેમણે કહ્યું કે હમાસના આતંકવાદીઓએ જે રીતે ઇઝરાયલીઓને માર્યા, તે અત્યંત ભયાનક હતું. આવી ભયાનકતાની કલ્પના પણ કરી શકાતી નથી. નેતન્યાહૂએ આગળ કહ્યું, દુશ્મનોને લાગ્યું હતું કે ઇઝરાયેલ તૂટી જશે, પરંતુ એવું થયું નહીં. અમે ઊભા થયા અને સિંહોની જેમ લડ્યા. ઇઝરાયલી PMએ છેલ્લા ત્રણ વર્ષથી 7 મોરચાઓ પર લડી રહેલા ઇઝરાયલી સૈનિકોની બહાદુરીની પણ પ્રશંસા કરી. તેમણે કહ્યું કે ઇઝરાયલી સૈનિકોએ પોતાના મહાન અમેરિકન મિત્રો સાથે મળીને હમાસ અને હિઝબુલ્લાહને ભારે નુકસાન પહોંચાડ્યું. લેબનાન- હિઝબુલ્લાહને પેજર હુમલાની યાદ અપાવી નેતન્યાહૂએ હિઝબુલ્લાહ વિરુદ્ધ કરવામાં આવેલી તે કાર્યવાહીનો પણ ઉલ્લેખ કર્યો, જેમાં સંગઠનના સભ્યો પાસે રહેલા પેજરમાં વિસ્ફોટ થયા હતા. તેમણે કહ્યું, શું તમને પેજર યાદ છે? હિઝબુલ્લાહને તો ચોક્કસ યાદ હશે. 17 સપ્ટેમ્બર 2024ના રોજ લેબનાન અને સીરિયામાં હિઝબુલ્લાહના સભ્યો દ્વારા ઉપયોગમાં લેવાતા હજારો પેજર એકસાથે ફાટી ગયા હતા, જેના કારણે 3,000થી વધુ લોકો ઘાયલ થયા હતા અને અનેક લોકોનાં મોત થયાં હતાં. નેતન્યાહૂએ પોતાનું ભાષણ ‘અમારી પાસે બીજો કોઈ વિકલ્પ નથી’ એમ કહીને પૂરું કર્યું. આ દરમિયાન ગેલેરીમાં લગભગ 30 સેકન્ડ સુધી તાળીઓ પડતી રહી.