પાકિસ્તાનના ફાસ્ટ બોલર હારિસ રઉફ માટે ઇંગ્લેન્ડ સામેની વનડે મેચમાં જીત બાદ મુશ્કેલી ઊભી થઈ છે. ICCએ મેદાન પરના તેમના વર્તન બદલ સત્તાવાર ફટકાર લગાવી છે અને મેચ ફીના 20%નો દંડ ફટકાર્યો છે. આ સાથે તેમના શિસ્તભંગના રેકોર્ડમાં 1 ડિમેરિટ પોઈન્ટ ઉમેરવામાં આવ્યો છે. 28 ઑક્ટોબર 2026ના રોજ ICCએ આ કાર્યવાહી અંગે જાહેરાત કરી હતી.
વિલ જેક્સ સાથે શું થયું હતું?
આ ઘટના 25 ઑક્ટોબરે લાહોરમાં પાકિસ્તાન અને ઇંગ્લેન્ડ વચ્ચે રમાયેલી વનડે મેચ દરમિયાન બની હતી. પાકિસ્તાનની ઇનિંગ્સની 46મી ઓવર પૂરી થતાં હારિસ રઉફ નોન-સ્ટ્રાઇકર છેડે ઊભા હતા. તેમણે વાઇડ બોલ માટે અપીલ કરી હતી, ત્યારબાદ ઇંગ્લેન્ડના ઓલરાઉન્ડર વિલ જેક્સ સાથે તેમની દલીલ થઈ હતી. ICCના જણાવ્યા અનુસાર, રઉફે આ દરમિયાન બેટ ઊંચું કર્યું હતું. મેદાન પરના અમ્પાયર શરફુદ્દૌલા ઇબ્ને શાહિદે તેમને ચેતવણી આપી હોવા છતાં તેમણે દલીલ ચાલુ રાખી હતી. ત્યારબાદ જેક્સ તરફ જતાં તેઓ અમ્પાયરને અડકીને આગળ વધ્યા હતા. આ વર્તનને રમતની ભાવનાની વિરુદ્ધ ગણાવીને ICCએ તેમના પર કાર્યવાહી કરી હતી.
કયા નિયમ હેઠળ થઈ કાર્યવાહી?
ICCએ હારિસ રઉફને આચારસંહિતાના લેવલ-1ના ભંગ બદલ દોષિત ઠેરવ્યા હતા. આ મામલો ખેલાડીઓ અને તેમના સપોર્ટ સ્ટાફ માટેની આચારસંહિતાની કલમ 2.20 હેઠળ આવ્યો હતો, જે રમતની ભાવનાની વિરુદ્ધના વર્તન સાથે સંબંધિત છે. રઉફના ખાતામાં 1 ડિમેરિટ પોઈન્ટ ઉમેરાતાં હવે તેમના કુલ પોઈન્ટ 5 થયા છે. છેલ્લા 24 મહિનામાં આ તેમનો ત્રીજો ગુનો હતો. ICCના નિયમો અનુસાર, 24 મહિનામાં 4 કે તેથી વધુ ડિમેરિટ પોઈન્ટ થાય તો તે સસ્પેન્શન પોઈન્ટમાં રૂપાંતરિત થઈ શકે છે. તેથી ભવિષ્યમાં વધુ શિસ્તભંગ થાય તો તેમના પર પ્રતિબંધનું જોખમ ઊભું થઈ શકે છે. રઉફે પોતાનો ગુનો સ્વીકારી લીધો હતો અને મેચ રેફરી જેફ ક્રો દ્વારા સૂચવવામાં આવેલી સજા સ્વીકારી હતી. તેથી ઔપચારિક સુનાવણીની જરૂર પડી નહોતી.
ઇંગ્લેન્ડની ટીમને પણ દંડ
આ જ મેચમાં ઇંગ્લેન્ડની ટીમ સામે પણ ICCએ કાર્યવાહી કરી હતી. સમયની છૂટછાટ ગણ્યા બાદ પણ ઇંગ્લેન્ડની ટીમ નિર્ધારિત સમયમર્યાદામાં 3 ઓવર ઓછી ફેંકી શકી હતી. આ કારણે કેપ્ટન હેરી બ્રૂકની ટીમ પર ખેલાડીઓની મેચ ફીના 15%નો દંડ લગાવવામાં આવ્યો હતો. ઇંગ્લેન્ડે પણ પોતાનો ગુનો સ્વીકારીને સજા સ્વીકારી હતી.
આ મેચમાં પાકિસ્તાને ઇંગ્લેન્ડને 1 વિકેટથી હરાવીને રોમાંચક જીત મેળવી હતી. શાદાબ ખાને અણનમ 113 રન બનાવીને ટીમને જીત અપાવવામાં મુખ્ય ભૂમિકા ભજવી હતી. શાદાબ અને હારિસ રઉફે છેલ્લી વિકેટ માટે અણનમ 89 રનની ભાગીદારી કરી હતી. આ જીત સાથે પાકિસ્તાને ODI ટ્રાઇ-સિરીઝની ફાઇનલમાં પણ સ્થાન મેળવ્યું હતું.
આ પણ વાંચો: ICC Ranking: ઈશાન કિશનનું રાજ ખતમ! અભિષેક શર્મા ફરી બન્યો દુનિયાનો નંબર-1 T20I બેટર