પાકિસ્તાનના ખૈબર પખ્તૂનખ્વા પ્રાંતમાં લગભગ 200 વર્ષ જૂના રામલીલા મંદિરને તોડી પાડવાનો પ્રયાસ કરવામાં આવ્યો. આરોપ છે કે મંદિરની જગ્યાએ કોમર્શિયલ પ્લાઝા બનાવવા માટે આ પગલું લેવામાં આવ્યું હતું. હિંદુ સમુદાય અને સામાજિક કાર્યકરોના વિરોધ બાદ સ્થાનિક પ્રશાસને શનિવારે મંદિરને પોતાના કબજામાં લીધું. ત્યારબાદ ઇવેક્યુઈ ટ્રસ્ટ પ્રોપર્ટી બોર્ડ (ETPB)એ તેને સીલ કરી દીધું. આ મંદિર ડેરા ઇસ્માઇલ ખાન શહેરના રહીમ બજાર વિસ્તારમાં આવેલું છે. ડેરા સિવિલ સોસાયટી અને સ્થાનિક વેપાર સંઘના અધ્યક્ષ સોહેલ અહમદ અજમીના જણાવ્યા મુજબ, તેમને મંદિર તોડી પાડવાની માહિતી મળતાં તેઓ અન્ય લોકો સાથે ઘટનાસ્થળે પહોંચ્યા અને કામ અટકાવ્યું. મંદિરની જમીનના માલિકીના હકની તપાસની માંગ મંદિર તોડવાનો પ્રયાસ થયા બાદ હિંદુ સમુદાય અને સામાજિક કાર્યકર્તાઓએ માંગ કરી કે મંદિરની જમીન કોની છે અને ત્યાં પ્લાઝા બનાવવાની મંજૂરી કોણે આપી, તેની તપાસ થવી જોઈએ. તેમણે નેતાઓને આ મામલો પાકિસ્તાનની સંસદમાં ઉઠાવવાની અપીલ પણ કરી. રામલીલા મંદિરને ડેરા ઇસ્માઇલ ખાનની પ્રાચીન ધાર્મિક ધરોહર માનવામાં આવે છે. ઇવેક્યૂઈ ટ્રસ્ટ પ્રોપર્ટી બોર્ડ (ETPB)એ જિલ્લાના આશરે 400 ઇમારતોને ઐતિહાસિક ધરોહર તરીકે ઓળખી છે. આ સરકારી સંસ્થા ભાગલા પછી ભારત ચાલ્યા ગયેલા લોકોની છોડી ગયેલી સંપત્તિઓ અને લઘુમતીઓના ધાર્મિક સ્થળોની દેખરેખ રાખે છે. ઑગસ્ટમાં પણ 100 વર્ષ જૂનું હિંદુ મંદિર તોડી પાડવામાં આવ્યું આ પહેલાં ઑગસ્ટમાં પણ પાકિસ્તાનના પંજાબ પ્રાંતમાં આશરે 100 વર્ષ જૂના હિંદુ મંદિરના તોડી પાડવામાં આવ્યાના સમાચાર સામે આવ્યા હતા. સ્થાનિક લોકો અને હિંદુ સમુદાયના પ્રતિનિધિઓએ આરોપ મૂક્યો હતો કે મંદિરને જાણીજોઈને તોડી પાડવામાં આવ્યું, જેથી તેની જમીન પર મદરેસા બનાવી શકાય. પાકિસ્તાને દાવો કર્યો હતો કે 21 જુલાઈએ ભારે વરસાદને કારણે મંદિરની ઇમારત ક્ષતિગ્રસ્ત થઈને ધરાશાયી થઈ ગઈ હતી. મંદિર તોડી પાડવાના મામલે પાકિસ્તાન મસીહા મિલ્લત પાર્ટી (PMMP), સ્થાનિક લોકો અને હિંદુ સમુદાયે સ્થાનિક મુસ્લિમ સમુદાયના કેટલાક લોકો પર આરોપ મૂક્યા હતા. તેમણે પ્રતિબંધિત સંગઠન તહરીક-એ-લબ્બૈક પાકિસ્તાન (TLP) સાથે જોડાયેલા લોકોની ભૂમિકા પર પણ સવાલ ઉઠાવ્યા હતા. મામલો સામે આવ્યા બાદ ભારતના વિદેશ મંત્રાલયે 2 સપ્ટેમ્બરે મંદિર તોડી પાડવાની નિંદા કરી હતી. ભારતે કહ્યું હતું કે મંદિરની સુરક્ષા માટે સ્થાનિક અધિકારીઓએ સમયસર કાર્યવાહી કરી નહોતી. પાકિસ્તાનમાં ધાર્મિક સ્થળોની સુરક્ષા પર સવાલો ઊભા થયા ઓલ પાકિસ્તાન હિંદુ રાઇટ્સ મૂવમેન્ટના અધ્યક્ષ હારૂન સરબ ડાયલે ધાર્મિક સ્થળોને વિશેષ સુરક્ષા આપવાની માંગ કરી છે. તેમણે 2013થી 2026 વચ્ચે ધાર્મિક સંપત્તિઓ પર થયેલા કથિત ગેરકાયદેસર કબજાઓ અને તેમની વેચાણની તપાસ કરાવવાની પણ અપીલ કરી છે. પાકિસ્તાનના માનવાધિકાર આયોગે પણ ધાર્મિક લઘુમતીઓના અધિકારોને લઈને ચિંતા વ્યક્ત કરી છે. આયોગના તાજેતરના અહેવાલમાં હિંદુ અને ખ્રિસ્તી યુવતીઓના અપહરણ, બળજબરીથી લગ્ન અને ધર્મ પરિવર્તનના કેસો સાથે ભેદભાવપૂર્ણ વ્યવહારનો ઉલ્લેખ કરવામાં આવ્યો છે. આયોગે ધાર્મિક સંપત્તિઓના સંચાલનમાં પારદર્શિતા અને જવાબદારી વધારવાની ભલામણ પણ કરી છે.