પાટણ પ્રજાપતિ જ્ઞાતિ સમાજ યુવા સંગઠન દ્વારા આયોજિત કેસરિયા ગરબા મહોત્સવનો ફાઇનલ રાઉન્ડ શનિવારે રાત્રે શહેરના વિપુલ પાર્ટી પ્લોટ ખાતે યોજાયો હતો. જગત જનની જગદંબાની આરાધનાના પાવન પર્વ નવરાત્રી નિમિત્તે આ મહોત્સવનું આયોજન ‘સમાજની દીકરી સમાજના આંગણે’ થીમ પર કરાયું હતું. સારથી ઓટો સારથી ટોયોટા મેઈન સ્પોન્સર હતા. આ મહોત્સવનું આયોજન છેલ્લા દોઢ મહિનાથી શહેરના સોની વાડા વિસ્તારમાં આવેલ વાઘેશ્વરી માતાની વાડી પરિસરમાં કરવામાં આવ્યું હતું. જેમાં સમાજના દીકરા-દીકરીઓ મળીને અંદાજિત 120 ખેલૈયાઓએ નવરાત્રીના ગરબાના વિવિધ સ્ટેપ્સ શીખીને આગામી મહોત્સવને યાદગાર બનાવવા મહેનત કરી હતી. આ પ્રસંગે સમાજના આગેવાનો ઉપસ્થિત રહ્યા હતા અને ખેલૈયાઓનો ઉત્સાહ વધાર્યો હતો. ફાઇનલ રાઉન્ડમાં વિજેતા બનેલા ખેલૈયાઓ તેમજ ભાગ લેનાર દરેક દીકરા-દીકરીઓને ઇનામો આપી પ્રોત્સાહિત કરાયા હતા.કેસરિયા નવરાત્રી મહોત્સવના આ કાર્યક્રમને સફળ બનાવવા પાટણ પ્રજાપતિ જ્ઞાતિ સમાજ યુવા સંગઠનના પ્રમુખ ઋત્વિકભાઈ પ્રજાપતિ સહિત તેમની સમગ્ર ટીમે જહેમત ઉઠાવી હતી.