રશિયાના રાષ્ટ્રપતિ વ્લાદિમીર પુતિને ગુરુવારે કહ્યું કે વડાપ્રધાન નરેન્દ્ર મોદી સતત યુક્રેન યુદ્ધ સમાપ્ત કરવાની વાત ઉઠાવે છે. તેમની પાસે યુદ્ધ રોકવા માટેના એવા સારા સૂચનો છે, જેને બંને પક્ષો સ્વીકારી શકે. પુતિને મોસ્કોમાં યોજાયેલા વાલદાઈ ફોરમ દરમિયાન PMનો આભાર પણ માન્યો. તેમણે કહ્યું, મોદી અમારા સારા મિત્ર છે, તેમ છતાં તેઓ સતત યુક્રેન યુદ્ધ સમાપ્ત કરવાની વાત ઉઠાવે છે. તેઓ યુદ્ધ જલદી સમાપ્ત થાય તેવા પક્ષમાં છે. હું આ માટે તેમનો આભાર માનું છું. PM મોદી 5 વખત આંતરરાષ્ટ્રીય મંચો પર યુક્રેન યુદ્ધનો મુદ્દો ઉઠાવી ચૂક્યા છે. સપ્ટેમ્બરમાં પુતિન-મોદીની મુલાકાતમાં પણ યુદ્ધ અંગે ચર્ચા થઈ હતી નવી દિલ્હીમાં BRICS સમિટ પહેલાં 11 સપ્ટેમ્બરે પુતિન અને PM મોદી વચ્ચે મુલાકાત થઈ હતી. આ દરમિયાન પુતિને મોદીને યુક્રેન યુદ્ધની વર્તમાન સ્થિતિ અને શાંતિ માટે ચાલી રહેલા પ્રયાસોની માહિતી આપી હતી. આ મુલાકાતના થોડા દિવસ પહેલાં રશિયાના રાષ્ટ્રપતિ કાર્યાલય ક્રેમલિનના પ્રવક્તા દિમિત્રી પેસ્કોવે કહ્યું હતું કે રશિયા યુક્રેન સંઘર્ષનો અંત લાવવા માટે ભારતના કોઈપણ શાંતિ પ્રયાસનું સ્વાગત કરશે. તેમણે કહ્યું હતું કે યુદ્ધનો ઉકેલ વાતચીત અને રાજદ્વારી માર્ગે લાવવાની ભારતની વિચારસરણી અને રશિયાની વ્યૂહરચના મોટા ભાગે એકસરખી છે. પુતિન બોલ્યા- હુમલો થશે તો તમામ હથિયારોનો ઉપયોગ કરીશું પુતિને ગુરુવારે કહ્યું કે રશિયા યુરોપના કોઈપણ દેશ પર હુમલો કરવાની યોજના બનાવી રહ્યું નથી. જોકે, જો રશિયાના કોઈ વિસ્તાર પર હુમલો થશે તો તે પોતાની સુરક્ષા માટે પોતાના તમામ હથિયારોનો ઉપયોગ કરશે. તેમણે પશ્ચિમી દેશો અને યુરોપ પર તણાવ વધારવાનો આરોપ લગાવ્યો. પુતિને કહ્યું કે પશ્ચિમી દેશો આગામી વર્ષોમાં રશિયા સાથે યુદ્ધની તૈયારીની વાત કરી રહ્યા છે, બાલ્ટિક સમુદ્રમાં સૈન્ય કવાયત કરી રહ્યા છે અને રશિયન જહાજોને જપ્ત કરી રહ્યા છે. પુતિનનું આ નિવેદન મોસ્કોની તે ચેતવણી બાદ આવ્યું છે, જેમાં NATOને કહેવામાં આવ્યું હતું કે જો તેના કોઈ દેશે રશિયાના કલિનિનગ્રાદ વિસ્તારને બાકીના રશિયાથી અલગ કરવાનો પ્રયાસ કર્યો, તો રશિયા તેની રક્ષા માટે પરમાણુ હથિયારોનો પણ ઉપયોગ કરી શકે છે. પુતિને ભારતની એકતાની પણ પ્રશંસા કરી પુતિને ભારતની અલગ-અલગ ભાષાઓ અને સંસ્કૃતિઓ સાથે મળીને રહેવાની પણ પ્રશંસા કરી. તેમણે કહ્યું, “ભારતનું કદ અને અહીંની વિવિધ પ્રકારની સંસ્કૃતિઓ આશ્ચર્યચકિત કરે છે.” પુતિને જણાવ્યું કે બહુ ઓછા લોકો આ વાત જાણે છે, પરંતુ PM મોદીએ તેમને જણાવ્યું હતું કે ભારતની 1.5 અબજની વસ્તીમાં આશરે 60 કરોડ લોકો હિન્દી બોલે છે. બાકીના લોકો અલગ-અલગ ભાષાઓ બોલે છે. તેમ છતાં બધા લોકો સાથે મળીને રહે છે. પુતિને તેને અદ્ભુત ગણાવ્યું. તેમણે કહ્યું કે ભારતની આ જ ખાસિયત તેની સંસ્કૃતિને વિશિષ્ટ બનાવે છે. આ દર્શાવે છે કે અલગ-અલગ હોવા છતાં લોકો એકસાથે રહી શકે છે. તેમણે કહ્યું, “દુનિયાએ ભારત પાસેથી આ શીખવું જોઈએ.”