ચીનની એક રેસ્ટોરન્ટે સૌને ચોંકાવી દીધા છે. સોશિયલ મીડિયા પર એક અજીબ વાનગી વાઇરલ થઈ રહી છે, જેને જોઈને કોઈપણ હેરાન થઈ જાય. મીઠી અને ક્રીમી પેસ્ટ્રી પર મોટા-મોટા કોકરોચ જેવા જીવડાને સજાવીને પીરસવામાં આવી રહ્યા છે. આ સાંભળીને જ અજીબ લાગે છે, પરંતુ ચીનમાં આ વાનગી ખૂબ ટ્રેન્ડ કરી રહી છે અને લોકો તેને ખૂબ ઉત્સાહથી ખાઈ પણ રહ્યા છે. કોકરોચ પેસ્ટ્રી શું છે? સાઉથ ચાઇના મોર્નિંગ પોસ્ટના અહેવાલ અનુસાર, આ મામલો ચીનના ગુઆંગડોંગ પ્રાંતના શુન્ડે વિસ્તારની એક રેસ્ટોરન્ટનો છે. ઓક્ટોબર 2026માં આ રેસ્ટોરન્ટે ‘વોટર રોચ એગ ટાર્ટ’ નામની નવી વાનગી શરૂ કરી હતી. દેખાવમાં તે મોટા કોકરોચ જેવી લાગે છે. તેને જોઈને લોકો કહી રહ્યા છે કે તેને જોવું પણ મુશ્કેલ છે. પરંતુ રેસ્ટોરન્ટના માલિક પાનનું કહેવું છે કે આ કોકરોચ નથી, પરંતુ પાણીમાં જોવા મળતો ડાઇવિંગ બીટલ છે. તેના 3 ટુકડાની કિંમત લગભગ 28 યુઆન એટલે કે આશરે 350 રૂપિયા છે અને દરરોજ લગભગ 20 સેટ વેચાઈ જાય છે. આ વાયરલ વાનગી કેવી રીતે બને છે? આ વાનગી બનાવવાની રીત પણ આશ્ચર્યજનક છે. સૌપ્રથમ આ જીવાતોની દુર્ગંધ દૂર કરવા માટે એક ખાસ પ્રક્રિયા કરવામાં આવે છે. ત્યારબાદ તેમને નિર્ધારિત તાપમાને તેલમાં તળવામાં આવે છે, જેથી તે કુરકુરા બની જાય. જીવાતોની પાંખોને એવી જ રાખવામાં આવે છે, જેથી તેમનું અસલી સ્વરૂપ જળવાઈ રહે. છેલ્લે આ તળેલી જીવાતોને પેસ્ટ્રીની ઉપર મૂકી દેવામાં આવે છે. રેસ્ટોરન્ટના માલિકનું કહેવું છે કે તેનો સ્વાદ એવો લાગે છે જાણે મીઠી પેસ્ટ્રી પર ચિપ્સ મૂકવામાં આવી હોય. અહીં જુઓ વાઇરલ વીડિયો જૂની ચીની ઔષધિ સાથે છે કનેક્શન અહેવાલ મુજબ, ભલે આજના લોકોને આ અજીબ લાગે, પરંતુ દક્ષિણ ચીનમાં આ જીવાતોને ખાવાની જૂની પરંપરા છે. પરંપરાગત ચીની ઔષધિમાં તેમને સ્વાસ્થ્ય માટે ફાયદાકારક માનવામાં આવે છે. કહેવાય છે કે તેઓ શરીરમાંથી ગંદકી દૂર કરવામાં અને લોહીના પ્રવાહને સુધારવામાં મદદ કરે છે. આ જ કારણે ગુઆંગઝોઉ અને હોંગકોંગ જેવા દૂરના વિસ્તારોમાંથી લોકો તેનો સ્વાદ ચાખવા અને વીડિયો બનાવવા આવી રહ્યા છે. દૂર દૂરથી આ ડીશ ખાવા પહોંચી રહ્યા છે લોકો આ ડીશ અંગે લોકોના અભિપ્રાયો અલગ-અલગ છે. કેટલાક લોકો તેને ખાવા વિશે વિચારીને જ અસ્વસ્થતા અનુભવી રહ્યા છે, જ્યારે કેટલાક લોકો તેનો અનોખો સ્વાદ અજમાવવા માંગે છે. ગ્વાંગઝોઉ અને હોંગકોંગ જેવા વિસ્તારોમાંથી પણ લોકો તેને ચાખવા માટે પહોંચી રહ્યા છે. સોશિયલ મીડિયા પર ઘણા લોકોએ તેની તસવીર જોઈને આશ્ચર્ય વ્યક્ત કર્યું છે. કેટલાક લોકોનું કહેવું છે કે આ જીવાત દેખાવમાં વંદા જેવી લાગે છે, તેથી તેઓ તેને ખાવાની કલ્પના પણ કરી શકતા નથી, જોઈને જ ઊલટી થઈ જાય. હાલમાં, આ અનોખી વાનગીએ પોતાના સ્વાદ કરતાં વધુ પોતાના દેખાવ અને તેમાં વપરાયેલી જીવાતને કારણે લોકોનું ધ્યાન ખેંચ્યું છે. આ ઘટના દર્શાવે છે કે ખાણીપીણીની દુનિયામાં કંઈક નવું કરવાની કોશિશો કેવી રીતે સોશિયલ મીડિયા પર ચર્ચાનો વિષય બની શકે છે.