પોરબંદર જિલ્લા આરોગ્ય વિભાગે ‘સેવા સંકલ્પ અભિયાન’ હેઠળ 22 અને 23 સપ્ટેમ્બર, 2026ના રોજ અલગ-અલગ આરોગ્ય અને સ્વચ્છતા કાર્યક્રમોનું આયોજન કર્યું છે. 22 સપ્ટેમ્બરે જિલ્લાના બધા પ્રાથમિક અને સામૂહિક આરોગ્ય કેન્દ્રોમાં ‘સ્વચ્છતા હી સેવા’ કાર્યક્રમ હેઠળ ખાસ સફાઈ અભિયાન ચલાવવામાં આવશે. 23 સપ્ટેમ્બરે જિલ્લાના તમામ સામૂહિક આરોગ્ય કેન્દ્રોમાં નાગરિકોની આરોગ્ય તપાસ, રોગની ઓળખ અને જરૂરી સારવાર માટે આરોગ્ય કેમ્પ યોજાશે. અડવાણા સામૂહિક આરોગ્ય કેન્દ્રમાં નિષ્ણાત ડોકટરો દ્વારા ખાસ આરોગ્ય કેમ્પ થશે. જ્યારે કુતિયાણા, રાણાવાવ અને માધવપુર સામૂહિક આરોગ્ય કેન્દ્રોમાં અનુભવી ડોકટરોની ટીમ આરોગ્ય તપાસ કરશે. જિલ્લા આરોગ્ય અધિકારી ડો. ડી.બી. મહેતાએ પોરબંદરના નાગરિકોને આ આરોગ્ય તપાસ અને સારવાર કેમ્પનો વધુમાં વધુ લાભ લેવા અને પોતાના સ્વાસ્થ્ય પ્રત્યે જાગૃત રહેવા અપીલ કરી છે.