બોપલ વિસ્તારમાં એક કારે આડેધડ 6 વાહનોને ટક્કર મારી હતી.આ ટક્કર મારનાર કાર પર આગળ પોલીસ લખેલી પ્લેટ જોવા મળી હતી.સ્થાનિકોએ કાર ચાલકને રોક્યો ત્યારે ચાલક નશામાં ધૂત જોવા મળ્યો હતો.કાર ચાલકને કોઈ ભાન જ નહોતું.સ્થાનિકોએ પોલીસ લખેલી પ્લેટ સાથે કારનો વિડિઓ ઉતારી પોલીસને જાણ કરી હતી.બોપલ પોલીસ સ્થળ પરથી કાર ચાલકની અટકાયત કરી ગુનો નોધી તપાસ હાથ ધરી છે.નશામાં ધૂત વ્યક્તિ પોલીસ કર્મચારી છે કે કેમ તેની પણ તપાસ કરવામાં આવી રહી છે. શહેરના બોપલ વિસ્તારમાં રહેતા નિશિથ શાહે ફરિયાદ નોંધાવી છે કે તેઓ તેમના અક્ષરધામ બંગલોઝના નિવાસ્થાને હતા.આ દરમિયાન તેમના ઘરની બહાર સાંજના 8:30 વાગ્યાની આસપાસ જોરથી અવાજ આવતા તેઓ બહાર ગયા ત્યારે એક ગ્રે કલરની i10 ગાડીનો ચાલક બેદરકારી રીતે ગાડી ચલાવી તેમની ડસ્ટર ગાડીને અથડાવી આગળ જઈ રહ્યો હતો. i10 ગાડીનો ચાલક થોડી આગળ જઈને ઉભો રહી ગયો હતો.i10 ગાડીના ચાલકે એક વાહન નહીં પરંતુ બે ફોર વ્હીલર અને ચાર ટુ-વ્હીલરને પણ ટક્કર મારી હતી. અકસ્માત થતા આસપાસના લોકો ભેગા થઈ ગયા હતા.જ્યારે અકસ્માત કરનાર i 10 ગાડી પર પોલીસ લખેલી પ્લેટ પણ મળી આવી હતી.જ્યારે સ્થાનિકોએ આ પોલીસ લખેલી કારમાં બેઠેલા વ્યક્તિને રોક્યો ત્યારે કારચાલકને કોઈ હોશ જ ન્હોતા. કારચાલક સંપૂર્ણ દારૂના નશામાં હોય તેમ લાગી રહ્યું હતું.સ્થાનિકોએ કારચાલકનો વિડીયો ઉતારીને પોલીસને જાણ કરતા બોપલ પોલીસ સ્થળ પર પહોંચી હતી.પોલીસે સ્થળ પર તપાસ કરી અકસ્માત કરનાર પ્રદ્યુમનસિંહ વાઘેલા વિરુદ્ધ ગુનો નોંધી અટકાયત કરી હતી. આ સમગ્ર પ્રકરણનો વિડીયો વાયરલ થયો તેમાં અકસ્માત કરનાર કારમાં આગળ પોલીસ લખેલી પ્લેટ હતી તે સ્પષ્ટ દેખાય છે અને કારનો ચાલક પણ નશામાં ધૂત હોવાનો દેખાઈ રહ્યું છે.છતાં પોલીસ દ્વારા ગાડીમાં આગળ પોલીસ લખેલી પ્લેટ પડી હોવાનો ફરિયાદમાં ક્યાંય ઉલ્લેખ કરવામાં આવ્યો નથી.આ ઉપરાંત આકસ્માત કરનાર પોલીસ કર્મચારી છે કે કેમ તેનો પણ કોઈ ઉલ્લેખ કરવામાં આવ્યો નથી.