ફ્રાન્સમાં મોંઘવારી, સ્કૂલોની ખરાબ સ્થિતિ અને પોલીસની કડક કાર્યવાહી સામે શનિવારે લાખો લોકો રસ્તા પર ઉતરી આવ્યા હતા. પેરિસ સહિત અનેક શહેરોમાં પ્રદર્શનકારીઓએ સરકાર વિરુદ્ધ નારેબાજી કરી હતી. પેરિસમાં માર્ચના અંતે પોલીસે પ્રદર્શનકારીઓ પર લાઠીચાર્જ કર્યો અને ટિયર ગેસના શેલ છોડ્યા હતા. ગૃહ મંત્રાલય અનુસાર, દેશભરમાં લગભગ 1,000 લોકોની ધરપકડ કરવામાં આવી છે. સરકારી આંકડાઓ અનુસાર, પ્રદર્શનોમાં આશરે 4 લાખ લોકો સામેલ થયા હતા. બીજી તરફ, ટ્રેડ યુનિયનોએ 8 લાખ લોકો સામેલ થયાનો દાવો કર્યો. ફ્રાન્સમાં પ્રદર્શનની 3 તસવીરો… પેરિસમાં 1.10 લાખ લોકો ભેગા થયા, પોલીસે ટિયર ગેસના શેલ છોડ્યા સરકારી અંદાજ મુજબ, પેરિસમાં આશરે 1.10 લાખ લોકોએ માર્ચ કરી હતી. પ્રદર્શનકારીઓએ મોંઘવારી, સરકારની પોલીસ વ્યવસ્થા અને સ્કૂલોની ખરાબ સ્થિતિ સામે અવાજ ઉઠાવ્યો. તેમના હાથમાં એવા બેનરો હતાં, જેના પર લખેલું હતું—’દમનથી બળવો જન્મે છે’ અને ‘પ્રદર્શન કરવું અમારો અધિકાર છે’. શરૂઆતમાં પ્રદર્શન શાંતિપૂર્ણ રહ્યું. તેમાં વિદ્યાર્થીઓ, વાલીઓ અને વૃદ્ધો પણ સામેલ થયા. જોકે, માર્ચ સમાપ્ત થતી વખતે કેટલાક નકાબધારી લોકોએ પોલીસ પર પથ્થરો અને કાચની બોટલો ફેંકી. કેટલીક જગ્યાએ કચરાપેટીઓમાં આગ લગાવવામાં આવી અને પોલીસ તરફ ફટાકડા ફેંકવામાં આવ્યા. ત્યારબાદ પોલીસે ટિયર ગેસ, વોટર કેનન અને સ્ટન ગ્રેનેડનો ઉપયોગ કર્યો. પોલીસે પ્રદર્શનકારીઓની ભીડ પર લાઠીચાર્જ પણ કર્યો. માર્સેઇમાં પોલીસ-પ્રદર્શનકારીઓ વચ્ચે અથડામણ, 2 ગંભીર રીતે ઘાયલ પેરિસ ઉપરાંત લિયોન, લીલ, મૉન્ટપેલિયર, નાંત અને ટૂલૂઝમાં પણ દેખાવો થયા. પોલીસે આ શહેરોમાં દેખાવકારોને મુખ્ય વિસ્તારો સુધી પહોંચતા રોકવા માટે ટિયર ગેસના શેલ છોડ્યા. માર્સેઈમાં પણ પોલીસ અને દેખાવકારો વચ્ચે અથડામણો થઈ. અહેવાલ મુજબ, ક્લેરમૉં-ફેરાં અને ટૂલૂઝમાં ઓછામાં ઓછા બે લોકો ગંભીર રીતે ઘાયલ થયા. ટૂલૂઝમાં એક વ્યક્તિની આંગળીઓ વિસ્ફોટક પોલીસ હથિયારને કારણે કપાઈ ગઈ હોવાના અહેવાલ છે. હિંસાની આશંકાને ધ્યાનમાં રાખીને ફ્રાન્સના શહેરોમાં 70 હજારથી વધુ પોલીસકર્મીઓ તહેનાત કરવામાં આવ્યા હતા. અનેક દુકાનોની બહાર સુરક્ષા માટે લાકડાના પાટિયા લગાવવામાં આવ્યા હતા અને ઘણા સંગ્રહાલયો બંધ રાખવામાં આવ્યા હતા. સ્કૂલોની ખરાબ હાલતથી શરૂ થયું આંદોલન ફ્રાન્સમાં આ આંદોલન સપ્ટેમ્બરમાં હાઈસ્કૂલના વિદ્યાર્થીઓના દેખાવોથી શરૂ થયું હતું. વિદ્યાર્થીઓ સ્કૂલોમાં શિક્ષકોની અછત, જર્જરિત ઇમારતો, છતમાંથી પાણી ટપકવાની સમસ્યા અને ભીડભર્યા વર્ગખંડોમાં પૂરતી ખુરશીઓ ન હોવાના વિરોધમાં દેખાવો કરી રહ્યા હતા. ધીમે ધીમે આ આંદોલનમાં શિક્ષકો, વાલીઓ અને ટ્રેડ યુનિયનો પણ જોડાઈ ગયા. પ્રદર્શનકારીઓએ સ્કૂલોની સ્થિતિ સુધારવા ઉપરાંત મોંઘવારી અને સરકારની કડક પોલીસ વ્યવસ્થાનો મુદ્દો પણ ઉઠાવ્યો. પ્રદર્શનકારીઓનો આરોપ છે કે સરકાર તેમની માગણીઓ પર વાતચીત કરવાને બદલે પોલીસ મારફતે આંદોલનને દબાવવાનો પ્રયાસ કરી રહી છે. પોલીસના વિસ્ફોટક હથિયારોને કારણે કેટલાક વિદ્યાર્થીઓ અને પ્રદર્શનકારીઓ ઘાયલ થવાના કેસોની તપાસ પણ ચાલી રહી છે. મેક્રોં સરકાર પર વિરોધ દબાવવાનો આરોપ પ્રદર્શનકારીઓએ રાષ્ટ્રપતિ ઇમેન્યુઅલ મેક્રોંની સરકાર પર વિરોધ કરવાનો અધિકાર મર્યાદિત કરવાનો આરોપ મૂક્યો. તેમનું કહેવું છે કે સરકારે કેટલાક પ્રદર્શનો પર પ્રતિબંધ મૂક્યો અને પ્રદર્શનકારીઓને શહેરોના મુખ્ય વિસ્તારોમાંથી દૂર રાખવાનો પ્રયાસ કર્યો. પેરિસમાં પ્રદર્શનમાં સામેલ 43 વર્ષની નાદેજે કહ્યું કે ગયા અઠવાડિયે શાંતિપૂર્ણ પ્રદર્શન દરમિયાન તેમના પર ટિયર ગેસના શેલ છોડવામાં આવ્યા હતા. તેમ છતાં તેઓ ફરીથી પ્રદર્શનમાં સામેલ થયાં. તેમણે કહ્યું કે રસ્તા પર પ્રદર્શન કરવું તેમનો કાનૂની અધિકાર છે અને તેઓ તેને બચાવવા માટે અહીં આવ્યાં છે. બીજી તરફ, પેરિસની એક સાયન્સ કૉલેજના 21 વર્ષીય વિદ્યાર્થીએ કહ્યું કે ફ્રાન્સમાં લોકોને લાગવા લાગ્યું છે કે સરકાર તેમના લોકશાહી અધિકારોને રોકવાનો પ્રયાસ કરી રહી છે. ગયા અઠવાડિયે હિંસામાં 2700 લોકોની ધરપકડ કરવામાં આવી હતી ફ્રાન્સમાં ગયા શનિવારે પણ મોટા પાયે હિંસા થઈ હતી. તોફાનીઓએ દુકાનોના કાચ તોડ્યા, સામાન લૂંટ્યો, વાહનોમાં આગ લગાવી અને સરકારી ઇમારતોને નિશાન બનાવી હતી. સમગ્ર દેશમાં ઓછામાં ઓછા 2700 લોકોની ધરપકડ કરવામાં આવી હતી. આ વખતે સરકારને આવી જ હિંસા ફરીથી થવાનો ભય હતો. આ કારણે મોટા પાયે પોલીસ તૈનાત કરવામાં આવી અને ઘણા જાહેર સ્થળોએ સુરક્ષા વધારવામાં આવી. વિપક્ષના નેતાએ કહ્યું- સરકારે માંગણીઓ સ્વીકારવી પડશે ડાબેરી નેતા અને રાષ્ટ્રપતિ પદના ઉમેદવાર જ્યં-લ્યૂક મેલેન્શોં પણ પેરિસના પ્રદર્શનમાં જોડાયા હતા. તેમણે કહ્યું કે દેશમાં વધતા અસંતોષને દૂર કરવા માટે મેક્રોને લોકોની માંગણીઓ સ્વીકારવી પડશે, નહીં તો પ્રદર્શનો વારંવાર થતા રહેશે. બીજી તરફ, ઓર્લિયૉં શહેરમાં હજારો લોકોએ જમણેરી અને ઇમિગ્રેશન વિરોધી પાર્ટી નેશનલ રેલીના સંમેલન વિરુદ્ધ માર્ચ કરી. પ્રદર્શનકારીઓએ પાર્ટીની નેતા મરીન લે પેન અને મેક્રો વિરુદ્ધ નારા લગાવ્યા હતા.
———————–