બનાસકાંઠા જિલ્લામાં ખેડૂતોને પડતી વિવિધ મુશ્કેલીઓ અને સરકારની નીતિઓ અંગે ચર્ચા કરવા પાલનપુરના ચંડીસર ખાતે કિસાન સંઘની એક મહત્વપૂર્ણ બેઠક યોજાઈ હતી. આ બેઠકમાં જિલ્લાના ખેડૂતોને અસર કરતા વિવિધ પ્રશ્નો પર વિસ્તૃત ચર્ચા કરવામાં આવી હતી. ખાસ કરીને બટાકાના પાકમાં સબસિડીનો અભાવ અને મગફળીના બિયારણની ફાળવણીમાં બનાસકાંઠા જિલ્લાને બાકાત રાખવા જેવા મુદ્દાઓ પર કિસાન સંઘના આગેવાનોએ ઉગ્ર રોષ વ્યક્ત કર્યો હતો. ખેડૂતોના હિતમાં સરકાર દ્વારા તાત્કાલિક યોગ્ય નિર્ણય લેવામાં આવે તેવી માંગ કરવામાં આવી હતી. બેઠકમાં આગામી દિવસોમાં ખેડૂતોના પ્રશ્નોને લઈને સરકાર સમક્ષ ઉગ્ર રજૂઆત કરવાનો નિર્ણય લેવાયો હતો. કિસાન સંઘના જણાવ્યા અનુસાર, આગામી એક મહિનામાં બનાસકાંઠા જિલ્લામાંથી અંદાજે 10 હજાર જેટલા ખેડૂતોને સાથે રાખીને વિવિધ માંગણીઓ અંગે સરકારને આવેદનપત્ર સુપરત કરવામાં આવશે. જો ખેડૂતોના પ્રશ્નોનો વહેલી તકે ઉકેલ નહીં આવે, તો આગામી સમયમાં આંદોલનને વધુ ઉગ્ર બનાવવાની ચીમકી પણ બેઠકમાં ઉચ્ચારવામાં આવી હતી.