બોટાદમાં ભારતીય મજદૂર સંઘ દ્વારા વિવિધ પડતર પ્રશ્નોને લઈને કલેક્ટર કચેરી ખાતે ધરણા પ્રદર્શન યોજવામાં આવ્યું હતું. આ દરમિયાન સંઘ દ્વારા કલેક્ટરને આવેદનપત્ર સુપરત કરીને વિરોધ નોંધાવવામાં આવ્યો હતો. ભારતીય મજદૂર સંઘના કર્મચારીઓની મુખ્ય માંગણીઓમાં વેતન વધારો, કોન્ટ્રાક્ટ પ્રથા નાબૂદ કરવી અને કર્મચારીઓનું થતું શોષણ બંધ કરવું વગેરેનો સમાવેશ થાય છે. આ પ્રશ્નોના નિરાકરણ માટે સંઘે રજૂઆત કરી હતી. કલેક્ટર કચેરી ખાતે મોટી સંખ્યામાં ભારતીય મજદૂર સંઘના કાર્યકરો એકઠા થયા હતા અને ધરણા પર બેસીને પોતાની માંગણીઓ રજૂ કરી હતી. તેમણે કર્મચારીઓને સંપૂર્ણ ન્યાય મળે અને શોષણમુક્ત વાતાવરણ બને તેવી અપીલ કરી હતી. આ અંગેની માહિતી ભારતીય મજદૂર સંઘના પ્રદેશ ઉપાધ્યક્ષ જે. બી. ચુડાસમાએ આપી હતી.