હવે બ્રિટનમાં પણ ભારતીય વિદ્યાર્થીઓની સંખ્યામાં ભારે ઘટાડો થવાની આશંકા છે. અમેરિકામાં ટ્રમ્પના શાસન દરમિયાન ભારતીય વિદ્યાર્થીઓ મુશ્કેલીઓનો સામનો કરી રહ્યા હતા, પરંતુ હવે બ્રિટનમાં પણ આવી જ સ્થિતિ સર્જાઈ રહી છે. સેન્ટર ફોર ગ્લોબલ હાયર એજ્યુકેશન (સીજીએચઈ) યુકેના અહેવાલમાં ચોંકાવનારા આંકડા સામે આવ્યા છે. 2027ના મે-જૂનના પ્રવેશોમાં (સમર ઇન્ટેક) ભારતીય વિદ્યાર્થીઓની સંખ્યામાં 20% સુધીનો ઘટાડો થઈ શકે છે. આ વર્ષે સપ્ટેમ્બર સુધીમાં ભારતીય વિદ્યાર્થીઓને આશરે 83 હજાર સ્ટુડન્ટ વિઝા મળ્યા હતા. આગામી વર્ષે આ સંખ્યા ઘટીને 63 હજાર રહેવાની આશંકા છે. તેનું સૌથી મોટું કારણ બ્રિટનની એન્ડી બર્નહામ સરકારની કડક વિઝા નીતિઓ છે. બ્રિટનમાં ગ્રેજ્યુએટ વર્ક વિઝાનો સમયગાળો ઘટાડીને દોઢ વર્ષ કરાયો હકીકતમાં, બ્રિટનમાં રિફોર્મ યુકે જેવી રાષ્ટ્રવાદી પાર્ટીઓના ઝડપથી ઉદયને કારણે વિઝા નિયમો કડક થઈ રહ્યા છે. રિફોર્મ યુકેના એજન્ડામાં સ્થાનિક લોકોને રોજગાર આપવો મુખ્ય છે. તેથી બર્નહામ સરકાર અમેરિકા જેવી રીતે વિઝા જાહેર કરતી વખતે બેકગ્રાઉન્ડ ચેકમાં કડકાઈ રાખી રહી છે. બ્રિટનમાં ગ્રેજ્યુએટ વર્ક વિઝાની મુદત બે વર્ષથી ઘટાડીને હવે દોઢ વર્ષ કરવામાં આવી છે. તેના કારણે વિદ્યાર્થીઓને અભ્યાસ બાદ બ્રિટનમાં નોકરી અને સંશોધન કરવા માટે ઓછો સમય મળી શકશે. ભારતમાં બ્રિટનની 9 યુનિવર્સિટીના કેમ્પસ ખુલ્યા વિઝા નિયમો કડક થવાની વચ્ચે એક રાહત પણ છે. બ્રિટનની સાઉથહેમ્પ્ટન, લિવરપૂલ, યોર્ક જેવી 9 યુનિવર્સિટીઓએ ભારતમાં પોતાના કેમ્પસ ખોલવાની જાહેરાત કરી છે. તેમાંથી કેટલીકમાં અભ્યાસ પણ શરૂ થઈ ગયો છે. જાણકારોનું માનવું છે કે ભારતીય વિદ્યાર્થીઓ અહીં પ્રવેશ લઈને બ્રિટનના સ્તરનું શિક્ષણ મેળવી શકે છે. આવનારા સમયમાં બ્રિટનની વધુ યુનિવર્સિટીઓ પણ અહીં આવશે. 4 પ્રશ્ન-જવાબમાં સમજો તેની શું અસર થશે; જર્મની-ફ્રાન્સ-આયર્લેન્ડ બનશે નવા સ્ટડી હબ ભારતીય વિદ્યાર્થીઓની અછતથી શું અસર થશે? ભારતીય વિદ્યાર્થીઓની સંખ્યામાં ઘટાડાથી બ્રિટનની અર્થવ્યવસ્થાને વાર્ષિક આશરે 10 હજાર કરોડ રૂપિયાનું નુકસાન સહન કરવું પડશે. પરંતુ બ્રિટનની સરકાર રાજકીય હિતો સાધવાના પ્રયાસમાં વિઝાના નિયમો કડક કરી રહી છે. હવે વિદ્યાર્થીઓ કયા દેશો તરફ વળશે? ભારતીય વિદ્યાર્થીઓ જર્મની, આયર્લેન્ડ અને ફ્રાન્સ તરફ વળશે. આ દેશોમાં સ્ટુડન્ટ વિઝાના મંજૂરી દર 90% સુધી છે. જર્મનીની સરકારી યુનિવર્સિટીઓમાં ફી માફી છે. વિઝાના મુદ્દાનો શું ઉકેલ આવી શકે? ભારત-બ્રિટન એફટીએ (ફ્રી ટ્રેડ એગ્રીમેન્ટ)માં ભારત તરફથી સ્ટુડન્ટ અને પ્રોફેશનલ વિઝામાં રાહત આપવાનો મુદ્દો મૂકવામાં આવ્યો હતો. બ્રિટનની તત્કાલીન ઋષિ સુનક અને ત્યારબાદ સ્ટાર્મર સરકારોએ અડગ વલણ અપનાવીને વિઝાની જોગવાઈઓ દૂર કરી દીધી હતી. ડિપેન્ડન્ટ વિઝામાં પણ મુશ્કેલીઓ શા માટે? બ્રિટનમાં વિદ્યાર્થીઓ અને પ્રોફેશનલ્સને મળતા ડિપેન્ડન્ટ (આશ્રિતો) વિઝામાં પણ કડકાઈ કરવામાં આવી છે. એટલે કે હવે બ્રિટનમાં આવનારા વિદ્યાર્થીઓ અને પ્રોફેશનલ્સ પત્ની, બાળકો અને માતા-પિતાને સાથે લાવી શકશે નહીં. આ માટે વાર્ષિક 58 લાખ રૂપિયાની લઘુત્તમ પગાર મર્યાદા નક્કી કરવામાં આવી છે. ——————————- ભારતના UN મિશનને રશિયાનો સાથ, ચીન-USના પેટમાં તેલ રેડાયું:વિદેશ મંત્રી લાવરોવે પશ્ચિમની ગુંડાગીરી ફગાવીને કહ્યું- ભારતને કાયમી સીટ આપીને જ રહેશે, હવે કોઈની દાદાગીરી નહીં ચાલે રશિયાના વિદેશ મંત્રી સર્ગેઈ લાવરોવે સંયુક્ત રાષ્ટ્ર સુરક્ષા પરિષદ (UNSC)માં ભારતની કાયમી સભ્યપદની દાવેદારીનું સમર્થન કર્યું. લાવરોવે કહ્યું કે સુરક્ષા પરિષદમાં એશિયા, આફ્રિકા અને લેટિન અમેરિકાનું પ્રતિનિધિત્વ વધવું જોઈએ. તેમણે કહ્યું, અમે બ્રાઝિલ અને ભારતની કાયમી સભ્યપદની દાવેદારીનું સમર્થન કરીએ છીએ. તેમણે સુરક્ષા પરિષદમાં પશ્ચિમી દેશોની વધારાની બેઠકોનો વિરોધ કર્યો. લાવરોવે ખાસ કરીને જર્મની અને જાપાનનું નામ લેતાં તેમના પર ‘સૈન્યવાદ અને બદલો લેવાની ભાવના તરફ આગળ વધવાનો’ આરોપ લગાવ્યો. વાંચો સંપૂર્ણ સમાચાર…