ભરૂચ શહેરમાં ગણેશ મહોત્સવની શોભાયાત્રા દરમિયાન પાંચબત્તી વિસ્તારમાં ફાયર શો યોજાઈ રહ્યો હતો. આ દરમિયાન અચાનક દુકાનોના ઉપરના ભાગે આવેલા હોડિંગમાં આગ ભભૂકી ઉઠતાં શોભાયાત્રામાં હાજર લોકોમાં અફરાતફરી મચી હતી. સોના જ્યુસ સેન્ટર અને અંબિકા જ્વેલર્સ આવેલી ઇમારતના ઉપરના ભાગે આગ લાગતા ઘટનાસ્થળે દોડધામ જોવા મળી હતી. ફાયર બ્રિગેડે પાણીનો મારો ચલાવી આગ પર કાબૂ મેળવ્યો
આગ લાગ્યાની જાણ થતાં ભરૂચ નગરપાલિકાના ફાયર બ્રિગેડનો કાફલો તાત્કાલિક પાંચબત્તી વિસ્તારમાં પહોંચ્યો હતો. ફાયર જવાનોએ પાણીનો મારો ચલાવી આગ પર કાબૂ મેળવ્યો હતો. આગ વધુ પ્રસરે તે પહેલાં જ કાબૂમાં આવી જતા સદનસીબે મોટી દુર્ઘટના ટળી હતી. ફાયર શોના આયોજન સામે સુરક્ષાને લઈને સવાલો
જાહેર માર્ગ પર મોટી સંખ્યામાં લોકોની હાજરી વચ્ચે ફાયર શો યોજાતા તેની સુરક્ષા વ્યવસ્થા સામે સવાલો ઉભા થયા છે. આવા કાર્યક્રમોમાં આસપાસ આવેલી દુકાનો, રહેણાંક મકાનો, વીજ લાઇનો, વાહનો તેમજ લોકોની સુરક્ષાને ધ્યાનમાં રાખીને પૂરતી તકેદારી રાખવી જરૂરી બને છે. આયોજન પહેલાં સુરક્ષા વ્યવસ્થાની ચકાસણી જરૂરી
ફાયર શો માટે સ્થળની આસપાસ કેટલું સુરક્ષિત અંતર રાખવામાં આવ્યું હતું, આગ ઝડપથી ફેલાય નહીં તે માટે શું વ્યવસ્થા કરવામાં આવી હતી અને ફાયર એક્સ્ટિંગ્વિશર સહિતના સાધનો ઉપલબ્ધ હતા કે નહીં તે અંગે તપાસ જરૂરી છે. તેમજ ઇમરજન્સીની સ્થિતિમાં લોકોને સલામત રીતે બહાર કાઢવા માટે પૂરતો માર્ગ ખુલ્લો રાખવામાં આવ્યો હતો કે નહીં તે પણ મહત્વનો સવાલ છે. મોટી દુર્ઘટના ટળી, તંત્ર માટે ચેતવણીરૂપ ઘટના
પાંચબત્તી ખાતે બનેલી આ ઘટના સમયસર આગ પર કાબૂ મેળવાતા મોટી દુર્ઘટનામાં પરિણમી નહોતી. જોકે, જાહેર કાર્યક્રમોમાં મનોરંજન સાથે સુરક્ષાને પણ પ્રાથમિકતા આપવાની જરૂરિયાત આ બનાવે ફરી એકવાર દર્શાવી છે. આગામી સમયમાં આવા ફાયર શો યોજાય ત્યારે મંજૂરી, નિયમો અને સલામતીના ધોરણોની કડક ચકાસણી કરવામાં આવશે કે કેમ તે જોવું રહ્યું.