ભરૂચ નગરપાલિકા દ્વારા હાથ ધરાયેલા સ્વચ્છતા અભિયાન હેઠળ વોર્ડ નંબર-8માં આવેલા સિટી સેન્ટર પાછળથી વર્ષો જૂનો કચરાનો મોટો ઢગલો શોધી કાઢવામાં આવ્યો છે. પાલિકા દ્વારા દરરોજ 2 વખત ડોર-ટુ-ડોર કચરા કલેક્શનની સુવિધા ઉપલબ્ધ હોવા છતાં, વેપારીઓ અને સંચાલકો દ્વારા ખુલ્લામાં કચરો ફેંકી ગંદકી ફેલાવવામાં આવતી હોવાનો વિરોધાભાસી કિસ્સો તપાસમાં ખુલ્લો પડ્યો છે. આ બેદરકારી બદલ પાલિકા તંત્રે સંચાલકોને ₹2,000નો દંડ ફટકારી 12 કલાકમાં કચરો હટાવવાનું અલ્ટીમેટમ આપ્યું છે. આકસ્મિક તપાસમાં ખુલ્લામાં ગંદકીનો ખુલાસો મુખ્ય અધિકારી હરીશ અગ્રવાલ અને સેનેટરી ઇન્સ્પેક્ટર ભૂમિ સેવક સહિતની ટીમે સ્થળ પર પહોંચીને આકસ્મિક તપાસ હાથ ધરી હતી. તપાસ દરમિયાન સામે આવ્યું હતું કે સિટી સેન્ટરના વેપારીઓ કચરો યોગ્ય જગ્યાએ ફેંકવાને બદલે પાછળના ભાગે ખુલ્લામાં નાખી રહ્યા હતા. કચરાના આ ઢગલાને કારણે રખડતાં પશુઓ પણ ત્યાં એકઠા થઈને ગંદકીમાં વધારો કરતા હતા. નાગરિકોને સહયોગ આપવા પાલિકાની અપીલ સેનેટરી ઇન્સ્પેક્ટરે સ્પષ્ટ કર્યું હતું કે નગરપાલિકા દ્વારા રોજના 2 સમયે ડોર-ટુ-ડોર ગાડીઓ મોકલવામાં આવે છે અને ફરિયાદો મળતાં ત્વરિત નિકાલ કરાય છે. પાલિકા તંત્રે વેપારીઓ તથા તમામ શહેરીજનોને જાહેર માર્ગો કે ખુલ્લી જગ્યામાં કચરો ન ફેંકવા અપીલ કરી છે. શહેરને સ્વચ્છ રાખવા માટે માત્ર કચરા કલેક્શનની ગાડીઓમાં જ કચરો આપી તંત્રને પૂર્ણ સહયોગ આપવા અનુરોધ કરવામાં આવ્યો છે.