બાંગ્લાદેશના પૂર્વ વડાપ્રધાન શેખ હસીનાના પ્રત્યર્પણને લઈને ભારતે કહ્યું કે તેમને આશ્રય આપવો ભારતની મજબૂરી હતી. આ વાત બાંગ્લાદેશમાં ભારતના હાઈ કમિશનર દિનેશ ત્રિવેદીએ શનિવારે કહી હતી. ત્રિવેદી બે ઓફ બંગાળ કન્વર્સેશન 2026 કાર્યક્રમમાં સામેલ થયા હતા. આ દરમિયાન એક વિદ્યાર્થીએ હસીનાના પ્રત્યર્પણ અંગે પણ સવાલ પૂછ્યો હતો. જવાબમાં ત્રિવેદીએ કહ્યું કે કાનૂની પ્રક્રિયા ચાલુ છે. હસીનાને બાંગ્લાદેશ ક્યારે મોકલવામાં આવશે, તેની સમયમર્યાદા જણાવી શકાય નહીં. સત્તા પરથી હટ્યા બાદ તેઓ 5 ઓગસ્ટ 2024ના રોજ ભારત આવ્યાં હતાં. છેલ્લા બે વર્ષથી હસીના ભારતમાં રહે છે. ભારત હસીનાને આવવા ન દેત તો સ્થિતિ ખરાબ થઈ શકતી હતી હસીનાને ભારત આવવા દેવાના નિર્ણય અંગે પણ ત્રિવેદીએ જવાબ આપ્યો. તેમણે કહ્યું કે 5 ઓગસ્ટ 2024ના રોજ જ્યારે હસીનાએ ઢાકા છોડ્યું, ત્યારે પણ તેઓ બાંગ્લાદેશના વડાપ્રધાન હતાં અને ત્યાંની પરિસ્થિતિ ઝડપથી બદલાઈ રહી હતી. ત્રિવેદીએ કહ્યું કે તે સમયે ભારત પાસે હસીનાને દિલ્હી ઉતરવાની મંજૂરી આપવા સિવાય કોઈ વિકલ્પ નહોતો. જો ભારત તેમને ઉતરવાની મંજૂરી ન આપત, તો સ્થિતિ ખરાબ થઈ શકતી હતી. હસીના બાંગ્લાદેશ એરફોર્સના વિમાનથી ભારત આવ્યા હતા ત્રિવેદીએ એ પણ સ્પષ્ટ કર્યું કે હસીનાને ભારત ભારતીય વાયુસેના અથવા ભારતીય સેનાના વિમાન દ્વારા લાવવામાં આવ્યા નહોતા. 5 ઓગસ્ટે તેમને સૌપ્રથમ બાંગ્લાદેશના સૈન્ય હેલિકોપ્ટર દ્વારા તેમના નિવાસસ્થાન નજીકથી બહાર કાઢવામાં આવ્યા હતા. ત્યારબાદ તેઓ બાંગ્લાદેશ એરફોર્સના વિમાનથી ભારત પહોંચ્યાં હતાં. ભારત-બાંગ્લાદેશ વચ્ચે પ્રત્યર્પણ સંધિ છે ભારત અને બાંગ્લાદેશે 2013માં પ્રત્યર્પણ સંધિ પર હસ્તાક્ષર કર્યા હતા. તેમાં કેટલીક પરિસ્થિતિઓમાં કોઈ વ્યક્તિને બીજા દેશને સોંપવાનો ઇનકાર કરવાની જોગવાઈઓ છે. તેમાં રાજકીય સ્વરૂપના ગુનાથી સંબંધિત કેસો પણ સામેલ છે. હસીના પર બાંગ્લાદેશમાં 2024ના આંદોલન દરમિયાન થયેલી હિંસા અને મોત સાથે જોડાયેલા ગંભીર આરોપો છે. બાંગ્લાદેશની વર્તમાન સરકાર તેમને પાછા લાવીને કાયદેસરની કાર્યવાહી કરવા માગે છે. બાંગ્લાદેશની ઇન્ટરનેશનલ ક્રાઇમ્સ ટ્રિબ્યુનલે નવેમ્બર 2025માં હસીના અને તેમના તત્કાલીન ગૃહમંત્રી અસદુઝ્જમાન ખાન કમાલને મોતની સજા સંભળાવી હતી. 15 સપ્ટેમ્બર 2026ના રોજ હસીના સરકારના કેટલાક ભૂતપૂર્વ સહયોગીઓને પણ સજા સંભળાવવામાં આવી હતી. સંયુક્ત રાષ્ટ્રના માનવાધિકાર કાર્યાલયની તપાસ મુજબ, જુલાઈ-ઓગસ્ટ 2024ના આંદોલન દરમિયાન આશરે 1,400 લોકોનાં મોત થયાં હતાં. હસીનાએ કહ્યું- ડિસેમ્બરમાં પરત ફરીશ હસીનાએ 5 ઓગસ્ટ 2026ના રોજ કહ્યું હતું કે તેઓ ડિસેમ્બર સુધી બાંગ્લાદેશ પરત ફરશે. CNN-News18ને આપેલા ઇન્ટરવ્યૂમાં તેમણે કહ્યું હતું કે તેઓ કાનૂની કાર્યવાહીનો સામનો કરવા માટે તૈયાર છે, પરંતુ તેમને સુરક્ષા, વકીલ સુધી પહોંચ, પોતાનો બચાવ કરવાનો અધિકાર, સ્વતંત્ર ન્યાયતંત્ર અને નિષ્પક્ષ સુનાવણી જોઈએ છે. તેમણે BNP સાથે કોઈપણ બેકચેનલ વાતચીતનો ઇનકાર કર્યો હતો અને કહ્યું હતું કે ભારત હજુ પણ તેમનો મિત્ર છે. ભારતે કહ્યું- બાંગ્લાદેશ પોતાના નિર્ણયો પોતે લે શેખ હસીનાનું ભારતમાં રહેવું બંને દેશો વચ્ચેનો એક સંવેદનશીલ મુદ્દો છે. બાંગ્લાદેશની વર્તમાન સરકાર ભારત પાસે હસીનાને પરત મોકલવાની માગ કરતી રહી છે. તે એ પણ ઈચ્છે છે કે હસીના ભારતથી બાંગ્લાદેશની રાજનીતિમાં દખલ ન કરે. ભારતે કહ્યું છે કે બાંગ્લાદેશ એક સ્વતંત્ર દેશ છે. તેને એ નક્કી કરવાનો સંપૂર્ણ અધિકાર છે કે તે કયા દેશ સાથે કેવા સંબંધો રાખશે.