વડોદરાના કારેલીબાગ રાત્રિ બજાર નજીક આવેલા મંગલ પાંડે બ્રિજ પરથી પસાર થતી વખતે નદીના કિનારે પથ્થરની ફેન્સિંગ પર મહાકાય મગર લટાર મારતો જોવા મળ્યો હતો. બ્રિજ પરથી પસાર થતા રાહદારીઓ અને વાહનચાલકો મગરને નજીકથી નિહાળવા માટે રોકાઈ જતાં રાજમાર્ગ પર અચરજ અને કુતૂહલનો માહોલ સર્જાયો હતો. વિશ્વામિત્રી અને વડોદરામાં મગરોની વસ્તી
વર્ષ 1960માં વિશ્વામિત્રી નદીમાં માત્ર 50 મગરો હતા, જે સંખ્યા વધીને આજે 420થી વધુ થઈ ગઈ છે. વડોદરા જિલ્લાની વાત કરીએ તો વિશ્વામિત્રી ઉપરાંત દેવ, ઢાઢર અને નર્મદા નદી સહિત વિવિધ તળાવોમાં મળીને કુલ 1,000થી પણ વધુ મગરો વસવાટ કરે છે. મગરની શિકાર પદ્ધતિ અને સરકારી સહાય
મગર શેડ્યૂલ-1નું સંરક્ષિત પ્રાણી છે. પાણીમાં ઊતરતી વખતે આંખ પર ગ્લેન્સ આવવાને કારણે તેની વિઝિબિલિટી 60% થી 70% ઘટી જાય છે. આથી તે પાણીમાં ઊઠતા તરંગોના આધારે શિકાર નક્કી કરે છે. નદી કિનારે કપડાં-વાસણ ધોતી વખતે કે છબછબિયાં કરતી વખતે મગર શિકાર સમજીને હુમલો કરી બેસે છે. મગરના હુમલામાં કોઈ વ્યક્તિનું મોત થાય તો સરકાર દ્વારા ₹4 લાખનું વળતર ચૂકવવામાં આવે છે.