સ્ટારશિપ ફ્લાઇટ 15એ એવું કરી બતાવ્યું જે આજ સુધી કોઈ રોકેટે કર્યું નહોતું. સ્ટારબેઝથી ઉડાન ભરી, ઑર્બિટમાં ગયું અને 26 સ્ટારલિંક V3 સેટેલાઇટ્સ તૈનાત કર્યા. પૃથ્વીની 14 પરિક્રમાઓ કરી, લગભગ 22 કલાક પૃથ્વીની કક્ષામાં રહ્યું, અને પછી પાછું આવીને એ જ ટાવર પર ઉતર્યું જ્યાંથી ઉડ્યું હતું. એટલે કે, ચોપસ્ટિક આર્મ્સે તેને પકડી લીધું. આ એક સંપૂર્ણ રાઉન્ડ ટ્રિપ છે. લૉન્ચથી ઑર્બિટમાં જવું અને પાછા એ જ લૉન્ચ પૅડ પર આવવું. શિપનું પાછું આવવું જ સૌથી મુશ્કેલ ભાગ હતો. બૂસ્ટરને પહેલાં જ 3 વખત પકડવામાં આવી ચૂક્યું છે. શિપનું ઑર્બિટલ ઝડપે પાછું આવવું, રી-એન્ટ્રી સહન કરવી, પલટી ખાવી અને હવામાં અટકીને આર્મ્સમાં આવી જવું—આ પહેલાં ક્યારેય થયું નહોતું. બૂસ્ટર નિષ્ફળ થયું, પરંતુ મિશન અટક્યું નહીં સ્પેસએક્સનો પ્લાન “ડબલ કૅચ” હતો. એટલે કે બૂસ્ટર પણ પાછું આવે અને યાન પણ. પરંતુ બૂસ્ટર પાછું ફરતી વખતે ટેકનિકલ મુશ્કેલી આવી. કન્ટ્રોલરે તેને ટાવરથી દૂર કરીને મેક્સિકોની ખાડી તરફ ડાયવર્ટ કરી દીધું, જ્યાં તે ફાટી ગયું. આ V3 બૂસ્ટર હતું. જૂના વર્ઝનને સ્પેસએક્સ 3 વાર પકડી ચૂક્યું છે, પરંતુ V3ને પહેલી વાર પકડવાનો પ્રયાસ હતો. સ્પેસએક્સના ડેન હૂટે કહ્યું: “હાલમાં આ અંગે કંઈ કહી શકતા નથી કે અમે તેને પાછું લાવવામાં કેમ સફળ ન થયા, પરંતુ યાન પકડાઈ જવું જ સૌથી મોટી જીત છે. યાનને ઑર્બિટમાંથી પાછું લાવવું જ સૌથી મુશ્કેલ હતું.” ફુલ રાઉન્ડ ટ્રિપથી શું બદલાશે 1. સ્પેસફ્લાઇટ હવે હવાઈજહાજ જેવી હશે: ફાલ્કન 9 માત્ર બૂસ્ટરને બચાવતું હતું. સ્ટારશિપ આખું રોકેટ બચાવી લે છે. કોઈ ભાગ ફેંકવાનો નહીં, સમુદ્રમાંથી ઉપાડવાનો નહીં. ઉતરો, ઈંધણ ભરો, ફરી ઉડાડો. સ્પેસએક્સનું લક્ષ્ય છે – 2027ના પહેલા છમાસિક ગાળા સુધી અઠવાડિયામાં એક લૉન્ચ. 2. અંતરિક્ષમાં ડેટા સેન્ટર હવે હકીકત: મસ્કની યોજના છે – ઑર્બિટમાં 10 લાખ સેટેલાઇટ સુધીનું નેટવર્ક, જે AI માટે ડેટા સેન્ટરનું કામ કરશે. અંતરિક્ષમાં સોલર પાવર 24×7 ઉપલબ્ધ છે, કૂલિંગ મફત છે, જમીન-પાણી-વીજળીના પરમિટની જરૂર નથી. સ્ટારશિપ એક જ વારમાં 100+ ટન સામાન લઈ જઈ શકે છે અને પાછો પણ લાવી શકે છે. 3. ચંદ્ર અને મંગળનો માર્ગ ખૂલ્યો: 2027માં ક્રૂ વિના ચંદ્ર પર લેન્ડિંગ, NASAના આર્ટેમિસ પ્રોગ્રામ માટે સ્ટારશિપ જ લૂનર લેન્ડર છે. મંગળ માટે ઑર્બિટમાં ઇંધણ ભરવું પડશે, જેના માટે ડઝનેક લૉન્ચની જરૂર પડશે. તે માત્ર સંપૂર્ણપણે પુનઃઉપયોગી રોકેટથી જ શક્ય છે. લુઇઝિયાનામાં $100 બિલિયનનું નવી લૉન્ચ સાઇટ બની રહી છે.