અમેરિકાના વિદેશ મંત્રી માર્કો રુબિયો મંગળવારે બે દિવસના ભારત પ્રવાસે મુંબઈ પહોંચ્યા. તેમની સાથે તેમની પત્ની અને ભારતમાં અમેરિકાના રાજદૂત સર્જિયો ગોર પણ હાજર છે. રુબિયોના આ પ્રવાસ દરમિયાન ભારત-અમેરિકા સંબંધો, વેપાર અને બંને દેશો વચ્ચે પ્રસ્તાવિત વ્યાપક વેપાર કરાર અંગે ચર્ચા થવાની અપેક્ષા છે. અમેરિકાના રાષ્ટ્રપતિ ડોનાલ્ડ ટ્રમ્પ દ્વારા રશિયન ઓઈલની ખરીદી અંગે ભારત પર લગાવવામાં આવેલા ભારે ટેરિફ હટાવ્યાના થોડા દિવસો બાદ થઈ રહેલો આ પ્રવાસ મહત્વપૂર્ણ માનવામાં આવી રહ્યો છે. માર્કો રુબિયો અને સર્જિયો ગોરે મહારાષ્ટ્રના CM દેવેન્દ્ર ફડણવીસ સાથે મુલાકાત કરી. તેમણે તેમની સાથે ગેટવે ઑફ ઈન્ડિયાની મુલાકાત પણ લીધી. માર્કો રુબિયોએ એસ. જયશંકર સાથે મુલાકાત કરી માર્કો રુબિયોએ મધ્ય પૂર્વના વિકાસ સહિત પ્રાદેશિક અને વૈશ્વિક મુદ્દાઓ પર ચર્ચા કરી. સેક્રેટરીએ પુનરોચ્ચાર કર્યો કે યુનાઇટેડ સ્ટેટ્સ (અમેરિકા) સાથે ઉર્જાનો વધેલો વેપાર ભારતની વિશાળ ગ્રાહક માગને પૂરી કરવાની સાથે તેની સપ્લાય ચેઇનને વૈવિધ્યસભર બનાવવામાં પરિવર્તનકારી ભૂમિકા ભજવી શકે છે. તેમણે દ્વિપક્ષીય સંરક્ષણ અને નાગરિક પરમાણુ સહયોગમાં તાજેતરના પ્રગતિની પ્રશંસા કરી, અને યુ.એસ. ટેકનોલોજી અને સિસ્ટમોની ખરીદી વધારવાની હિમાયત કરી, જે બંને દેશોની સુરક્ષા અને સમૃદ્ધિને વધારી શકે છે. 26/11ના હુમલાના પીડિતોને શ્રદ્ધાંજલિ આપી રુબિયોએ મુંબઈમાં 26 નવેમ્બર, 2008ના રોજ થયેલા આતંકવાદી હુમલાના પીડિતોને શ્રદ્ધાંજલિ આપી. આ ઉપરાંત, તેઓ અમેરિકાની સ્વતંત્રતાના 250 વર્ષ પૂર્ણ થવાના અવસર પર આયોજિત એક સ્વાગત સમારંભમાં પણ ભાગ લેશે. જામનગરમાં વિશ્વની સૌથી મોટી ઓઈલ રિફાઇનરીની મુલાકાત કરશે મુંબઈ પ્રવાસ બાદ રુબિયો જામનગર જશે. અહીં તેઓ ઉદ્યોગપતિ મુકેશ અંબાણીની માલિકીની રિલાયન્સ ઇન્ડસ્ટ્રીઝ દ્વારા સંચાલિત વિશ્વની સૌથી મોટી ઓઈલ રિફાઇનરીની મુલાકાત લેશે. પાંચ મહિનાથી પણ ઓછા સમય પહેલાં ક્વાડ શિખર સંમેલનમાં ભાગ લીધા બાદ આ રુબિયોનો ભારત પ્રવાસ છે. ભારત અને અમેરિકા વચ્ચે વેપાર કરાર અંગે ચાલી રહેલી વાટાઘાટો વચ્ચે આ પ્રવાસ પર બંને દેશોની નજર રહેશે.