ભુજ શહેર નજીક માધાપર રોડ પર કાસમપીર દર્ગા પાસે આજે સાંજે ડીઝલ ભરેલા વાહનમાં અચાનક આગ લાગવાની ઘટના બનતા થોડા સમય માટે અફરાતફરીનો માહોલ સર્જાયો હતો. ઘટનાની જાણ ભુજ ફાયર કંટ્રોલ રૂમને કરવામાં આવતાં ફાયર વિભાગની ટીમ તાત્કાલિક હરકતમાં આવી હતી. મળતી માહિતી મુજબ, સાંજે આશરે ૫ વાગ્યાના અરસામાં ભુજ ફાયર કંટ્રોલ રૂમને માધાપર રોડ પર કાસમપીર દરગાહ નજીક આગ લાગ્યાનો કોલ મળ્યો હતો. સ્થળ પર ગાડી નંબર GJ-31-T-3450માં અંદાજે ૨૦ હજાર લીટર ડીઝલ ભરેલું હોવાનું જણાવાયું હતું. ડીઝલ ભરેલા વાહનમાં કોઈ કારણસર આગ ભભૂકી ઊઠતાં પરિસ્થિતિ ગંભીર બની હતી. ફાયર કંટ્રોલ રૂમમાં જાણ થતાં જ ઘટનાની ગંભીરતાને ધ્યાનમાં રાખીને ફાયર વિભાગ દ્વારા એક મિની વોટર ટેન્કર અને એક વોટર બાઉઝર સહિત કુલ બે ટેન્કરને તાત્કાલિક ઘટનાસ્થળે રવાના કરવામાં આવ્યા હતા. ફાયર ટીમે સ્થળ પર પહોંચીને આગ પર નિયંત્રણ મેળવવા માટે પાણીનો મારો શરૂ કર્યો હતો. ડીઝલ ભરેલા વાહનમાં આગ લાગી હોવાથી આગ વધુ પ્રસરે નહીં અને આસપાસના વિસ્તારમાં જોખમ ઊભું ન થાય તે માટે ફાયર કર્મચારીઓએ સાવચેતીપૂર્વક કામગીરી હાથ ધરી હતી. ફાયર વિભાગની ઝડપી કામગીરીના પગલે આગને સમયસર કાબૂમાં લેવામાં સફળતા મળી હતી. આગ પર નિયંત્રણ મેળવવામાં આવતાં વાહનમાં રહેલા ડીઝલનો પણ બચાવ કરવામાં આવ્યો હતો. સમયસર ફાયર ટીમ ઘટનાસ્થળે પહોંચી જતાં સંભવિત મોટી દુર્ઘટના ટળી હોવાનું જણાયું હતું. આ આગ બુઝાવવાની કામગીરીમાં ડી.સી.ઓ. રવિરાજ ગઢવી અને મહેશ ગોસ્વામીના માર્ગદર્શન હેઠળ ફાયરમેન મહેશ મહેશ્વરી, સુરમલ ડામોર, કરણ જોષી, ઉજ્જવલ ગોસ્વામી, સાહિલ પટ્ટણી, મીત ગોસ્વામી અને કુશ અબોટી જોડાયા હતા. ફાયર વિભાગની ત્વરિત કામગીરીથી આગને નિયંત્રણમાં લઈ વધુ નુકસાન અટકાવવામાં આવ્યું હતું. ઘટના અંગે આગ લાગવાનું ચોક્કસ કારણ જાણવા માટેની વિગતો હજુ સ્પષ્ટ થવાની બાકી છે.