મોરબીમાં ઓલ ઈન્ડિયા રેડિયો (આકાશવાણી) સ્ટેશન સ્થાપવાની કામગીરી આગળ વધી રહી છે. મંત્રી કાંતિભાઈ અમૃતિયાના પ્રયાસો બાદ, આ પ્રોજેક્ટ માટે પ્રસ્તાવિત સ્થળનું ઉચ્ચ અધિકારીઓ દ્વારા નિરીક્ષણ કરવામાં આવ્યું હતું. સ્થળ નિરીક્ષણ દરમિયાન, અધિકારીઓએ જગ્યાની યોગ્યતા, જરૂરી માળખાકીય સુવિધાઓ અને સ્ટેશન સ્થાપવા સંબંધિત વિવિધ પાસાઓની પ્રાથમિક સમીક્ષા કરી હતી. આ નિરીક્ષણમાં ઓલ ઈન્ડિયા રેડિયો, નવી દિલ્હીના એડિશનલ ડાયરેક્ટર જનરલ અભિષેક અગ્રવાલ, ડેપ્યુટી ડાયરેક્ટર જનરલ રવિન્દ્ર ગોયલ અને આકાશવાણી અમદાવાદ-ગુજરાત ક્લસ્ટરના ડેપ્યુટી ડાયરેક્ટર જનરલ એન. એલ. ચૌહાણ સહિતના ઉચ્ચ અધિકારીઓ હાજર રહ્યા હતા. મોરબી મહાનગરપાલિકાના મેયર ઉત્તમભાઈ સુરાણી અને જયદીપભાઈ દેત્રોજા સહિતના સ્થાનિક આગેવાનો પણ આ પ્રસંગે ઉપસ્થિત રહ્યા હતા. અધિકારીઓ અને આગેવાનો વચ્ચે પ્રોજેક્ટના અમલીકરણ અંગે ચર્ચા કરવામાં આવી હતી. મોરબીમાં આકાશવાણી સ્ટેશન શરૂ થવાથી સ્થાનિક સમાચાર, શિક્ષણ, કૃષિ, ઉદ્યોગ, સંસ્કૃતિ, લોકકલા અને સામાજિક જાગૃતિને લગતા કાર્યક્રમોને વ્યાપક માધ્યમ મળશે. તે સ્થાનિક પ્રતિભાઓ, કલાકારો અને વિવિધ ક્ષેત્રના લોકોને પોતાની કલા રજૂ કરવા માટે એક મહત્વપૂર્ણ પ્લેટફોર્મ પૂરું પાડશે. મંત્રી કાંતિભાઈ અમૃતિયાના પ્રયાસોથી આ મહત્વપૂર્ણ સુવિધા સાકાર થવાની દિશામાં કામગીરી આગળ વધી રહી છે, જે શહેર અને જિલ્લાના વિકાસમાં એક નવો અધ્યાય ઉમેરશે તેવી આશા છે.