મોરબીના જેતપર ગામે છેલ્લા ચાર મહિના કરતાં વધુ સમયથી ચાલી રહેલા ખેડૂત આંદોલનનો સુખદ અંત આવવાના સંકેતો સાંપડી રહ્યા છે. ગાંધીનગરમાં ઉર્જા મંત્રી ઋષિકેશ પટેલ અને કૃષિ મંત્રી જીતુ વાઘાણી સાથે ખેડૂત આગેવાનોની ઉચ્ચ સ્તરીય બેઠક યોજાઈ હતી. આ બેઠકમાં ખેડૂતો દ્વારા તેમની વિવિધ ૨૪ જેટલી મુખ્ય માગણીઓ સરકાર સમક્ષ રજૂ કરવામાં આવી હતી. આ મુલાકાત બાદ ચાર મહિનાથી ચાલતા સત્યાગ્રહનો વહેલી તકે ઉકેલ આવે તેવી આશા જાગી છે. ત્રણ કલાક ચાલેલી મધ્યસ્થી બેઠકમાં 24 મુદ્દાઓ પર વિગતવાર ચર્ચા
જેતપર આંદોલનના આગેવાન પ્રતિક પટેલે જણાવ્યા અનુસાર, સિદસર ઉમિયા ધામના ઉપપ્રમુખની મધ્યસ્થી અને હાજરીમાં આ બેઠક ત્રણ કલાક સુધી સતત ચાલી હતી. આ બેઠકમાં રાજ્યના સંબંધિત વિભાગોના સચિવો અને ઉચ્ચ અધિકારીઓ પણ ખાસ ઉપસ્થિત રહ્યા હતા. બેઠક દરમિયાન ખેડૂતોના તમામ ૨૪ મુદ્દાઓ પર ઊંડાણપૂર્વક વિચારણા કરવામાં આવી હતી. વિવિધ જિલ્લાઓમાંથી આવેલા ખેડૂત પ્રતિનિધિઓએ પોતાના પક્ષની વિગતો મંત્રીઓ સમક્ષ રજૂ કરી હતી. મુખ્યમંત્રી સાથે ચર્ચા બાદ આગામી રણનીતિ અને વળતરનો પ્રશ્ન
સરકાર તરફથી ખેડૂતોની વધુમાં વધુ માગણીઓ સંતોષવાની અને પૂરતું નાણાકીય વળતર અપાવવાની સકારાત્મક ખાતરી આપવામાં આવી છે. મોટાભાગના પ્રશ્નો પર સરકારનું વલણ હકારાત્મક રહ્યું છે, જેમાં વીજપોલ અને કોરિડોરના વળતરનો ઉકેલ આવતાં જ આંદોલન સમેટાઈ શકે છે. હવે બંને મંત્રીઓ મુખ્યમંત્રી સાથે આ મુદ્દે ચર્ચા કરશે. ત્યારબાદ ખેડૂતોને ફરીથી વાટાઘાટો માટે બોલાવવામાં આવશે તેવું આયોજન નક્કી કરવામાં આવ્યું છે.