મોરબી તાલુકા પોલીસે છરી બતાવી લૂંટ અને ઘરફોડ ચોરી કરતી ગેંગનો પર્દાફાશ કર્યો છે. પરપ્રાંતીય મજૂરોને નિશાન બનાવતી આ ગેંગના ત્રણ સાગરીતોને ઝડપી પાડી, પોલીસે ₹75 હજારનો મુદ્દામાલ કબજે કર્યો છે. આ ગેંગ દ્વારા 27 ઓગસ્ટ 2026ના રોજ રાત્રિના સાડા અગિયાર વાગ્યે ભરતનગરથી ખોખરા હનુમાન તરફ જતા રોડ પર એક ઘટનાને અંજામ આપવામાં આવ્યો હતો. ત્રણ અજાણ્યા શખ્સોએ ફરિયાદી અને તેના સાથીઓને છરી બતાવી જાનથી મારી નાખવાની ધમકી આપી હતી. તેઓ પાસેથી બે મોબાઇલ ફોન અને ₹1 હજાર રોકડા લૂંટી ફરાર થઈ ગયા હતા. આ ઉપરાંત, રંગપર-જીવાપર તરફ જતા રોડ પાસે આવેલા લુપ્ટેન સિરામિકના લેબર ક્વાર્ટરમાં પણ મોડી રાત્રે ચોરી થઈ હતી. અજાણ્યા શખ્સોએ પ્રવેશ કરી અલગ-અલગ કંપનીના સાત મોબાઇલ ફોન, કુલ ₹29 હજારની કિંમતના, ચોરી કર્યા હતા. આ બંને બનાવો અંગે મોરબી તાલુકા પોલીસ સ્ટેશનમાં ગુના નોંધાયા હતા. વણશોધાયેલા ગુનાઓનો ભેદ ઉકેલવા માટે પોલીસ ઇન્સ્પેક્ટરના માર્ગદર્શન હેઠળ સર્વેલન્સ સ્ટાફની અલગ-અલગ ટીમો બનાવવામાં આવી હતી. તપાસ દરમિયાન, ખાનગી બાતમીના આધારે પોલીસે કાર્યવાહી કરી. બેલા (રં) ગામથી ખોખરા હનુમાન તરફ જતા રોડ ઉપર 66 કેવી સબ સ્ટેશનથી આગળના પુલિયા પાસે વોચ ગોઠવી ત્રણ શખ્સોને ઝડપી પાડવામાં આવ્યા હતા. પકડાયેલા આરોપીઓમાં વિકાસભાઈ અનિલભાઈ લોરીયા, ભુપતભાઈ મોહનભાઈ ચૌહાણ અને ચિરાગભાઈ નાનજીભાઈ ચાવડાનો સમાવેશ થાય છે. પોલીસે તેમની પાસેથી કુલ 12 એન્ડ્રોઇડ મોબાઇલ ફોન (કિંમત ₹54 હજાર), એક તીક્ષ્ણ અણીદાર છરી, ₹1 હજાર રોકડા અને એક્સેસ મોટરસાયકલ નંબર GJ-36-AQ-1165 (કિંમત ₹20 હજાર) સહિત કુલ ₹75 હજારનો મુદ્દામાલ કબજે કર્યો છે. મોરબી તાલુકા પોલીસે ત્રણેય આરોપીઓને ઝડપી પાડી બંને ગુનાઓનો ભેદ ઉકેલી આગળની કાયદેસરની કાર્યવાહી હાથ ધરી છે.