મોરબી શહેરમાં જન્માષ્ટમીના તહેવારને ધ્યાનમાં રાખીને ફૂટ પેટ્રોલિંગ કરવામાં આવ્યું. આજે DySPની હાજરીમાં શહેરના મુખ્ય માર્ગો પરથી પોલીસ પસાર થઈ હતી. આ દરમિયાન જન્માષ્ટમીની શોભાયાત્રાના રૂટ પર પોલીસ કર્મચારીઓને જરૂરી સૂચનાઓ અપાઈ હતી. પોલીસ દ્વારા જન્માષ્ટમીના પર્વ દરમિયાન કોઈ અનિચ્છનીય ઘટના ન બને તે માટે પૂરતી તકેદારી રાખવામાં આવી રહી છે. દર વર્ષની જેમ આ વર્ષે પણ મોરબી શહેરના મુખ્ય માર્ગો પર ફૂટ પેટ્રોલિંગ કરાયું હતું. મોરબીના DySP જે.એમ.આલની આગેવાની હેઠળ આ પેટ્રોલિંગ સરદાર રોડ, નગર દરવાજા ચોક, ગ્રીન ચોક થઈને દરબારગઢ પાસે આવેલા ખોડીયાર માતાજીના મંદિર પાસે પૂરું થયું હતું. આ સમયે મોરબી એ ડિવિઝનના PI, LCB અને SOGના PI, PSI અને અન્ય પોલીસ કર્મચારીઓ હાજર રહ્યા હતા. જન્માષ્ટમી દરમિયાન બંદોબસ્ત માટે પોલીસ કર્મચારીઓને જરૂરી માર્ગદર્શન અને સૂચનાઓ આપવામાં આવી હતી.