મંગળવારે યુરોપના અલગ-અલગ દેશોમાં અનેક વિમાનોને બોમ્બથી ઉડાવી દેવાની ધમકીઓ મળી હતી. આ ધમકીઓ બાદ ઇટાલીએ બે વિમાનોને સુરક્ષિત એરપોર્ટ સુધી પહોંચાડવા માટે પોતાની વાયુસેનાના વિમાનો મોકલ્યા, જ્યારે પોલેન્ડમાં એક એરપોર્ટને થોડા સમય માટે બંધ કરવું પડ્યું. સ્પેનમાં પણ એક વિમાનની તલાશી લેવામાં આવી હતી. જોકે, તપાસ બાદ તમામ ધમકીઓ ખોટી સાબિત થઈ. કોઈપણ વિમાનમાં વિસ્ફોટક મળ્યું નહોતું અને ન તો કોઈનું મૃત્યુ થયું હતું. આ ધમકીઓના કારણે ઇટાલી, પોલેન્ડ અને સ્પેનના એરપોર્ટ પર થોડા સમય માટે અફરાતફરીનો માહોલ રહ્યો. ધમકી મળેલા વિમાનોમાં રાયનેઅર, પોલેન્ડની LOT અને સ્કેન્ડિનેવિયન એરલાઇન્સ (SAS)ની ફ્લાઇટ્સ સામેલ હતી. કોઈપણ વિમાનને ઇમરજન્સી લેન્ડિંગ કરવું પડ્યું નહોતું. ઇટાલીમાં ઈમેલ દ્વારા બોમ્બની ધમકી મળી ઇટાલીમાં લિસ્બનથી રોમ જઈ રહેલી રાયનેઅરની ફ્લાઇટને મંગળવારે સવારે એક ઈમેલ મળ્યો, જેમાં વિમાનમાં બોમ્બ હોવાનો ઉલ્લેખ કરવામાં આવ્યો હતો. આ પછી વિમાનને રોમના ફ્યૂમિચિનો એરપોર્ટ પર ઉતારવામાં આવ્યું. પોલીસે બોમ્બ નિરોધક દળે મુસાફરો, ક્રૂ અને સામાનની તપાસ કરી, પરંતુ કંઈ મળ્યું નહીં. ડબલિનથી રોમ આવી રહેલી રાયનએરની બીજી એક ફ્લાઇટને પણ આવી જ ધમકી મળી. ઇટાલીની એરફોર્સે આ વિમાનને ફ્યૂમિચિનો એરપોર્ટ સુધી એસ્કોર્ટ કર્યું. અહીં પણ તપાસમાં કોઈ વિસ્ફોટક મળ્યું નહીં. પોલેન્ડમાં ફ્લાઇટનો માર્ગ બદલાયો, એરપોર્ટ બંધ રહ્યું પોલેન્ડમાં લંડનથી વોર્સો જઈ રહેલી LOT એરલાઇનની ફ્લાઇટને બોમ્બની ધમકી મળી. ત્યાર બાદ વિમાનને વોર્સોના મુખ્ય એરપોર્ટને બદલે મોડલિન એરપોર્ટ પર ઉતારવામાં આવ્યું. તપાસ માટે આ એરપોર્ટને થોડા સમય માટે બંધ રાખવું પડ્યું. તપાસ દરમિયાન વિમાનની અંદર કંઈ મળ્યું નહીં. તપાસ બાદ મુસાફરોને બસ દ્વારા વારસોના એરપોર્ટ પર પહોંચાડવામાં આવ્યા. આ દરમિયાન કોપનહેગનથી વારસો આવી રહેલી SAS એરલાઇનની ફ્લાઇટમાં પણ શંકાસ્પદ સામાન હોવાની માહિતી મળી. વિમાન ઉતર્યા બાદ મુસાફરોની તપાસ કરવામાં આવી, પરંતુ કંઈ પણ શંકાસ્પદ મળ્યું નહીં. સ્પેનમાં 121 મુસાફરોની તલાશી લેવામાં આવી સ્પેનના મર્સિયા એરપોર્ટ પર મેનચેસ્ટરથી આવેલી રાયનએરની ફ્લાઇટને પણ બોમ્બની ધમકી મળી હતી. વિમાનમાં ક્રૂ સહિત 121 લોકો સવાર હતા. અધિકારીઓએ મુસાફરો અને ક્રૂની તપાસ કરી હતી. વિમાનની પણ તલાશી લેવામાં આવી હતી, પરંતુ કોઈ વિસ્ફોટક મળ્યું નહોતું. મર્સિયા ક્ષેત્રમાં સ્પેન સરકારના પ્રતિનિધિ ફ્રાન્સિસ્કો લુકાસે સોશિયલ મીડિયા પર આ અંગેની માહિતી આપી હતી. ઓગસ્ટથી અત્યાર સુધી અનેક ખોટી ધમકીઓ મળી 3 નવેમ્બર: યુરોપમાં એક જ દિવસમાં ઓછામાં ઓછા 4 વિમાનોને બોમ્બની ધમકી મળી હતી. તેના એક દિવસ પહેલાં લંડનથી સોફિયા જઈ રહેલી વિઝ એરનની ફ્લાઇટને પણ બુડાપેસ્ટ તરફ વાળવી પડી હતી. તપાસમાં કોઈ વિસ્ફોટક મળ્યા નહોતા. 10 સપ્ટેમ્બર: લખનૌથી દમ્મામ જઈ રહેલી ઇન્ડિગોની ફ્લાઇટને બોમ્બની ધમકી બાદ અમદાવાદ ડાયવર્ટ કરવામાં આવી. વિમાનના ટોયલેટમાં બોમ્બ લખેલા ટિશ્યૂ મળ્યા બાદ તેની તલાશી લેવામાં આવી. 31 ઑગસ્ટ: દમ્મામથી દિલ્હી આવી રહેલી એર ઇન્ડિયા એક્સપ્રેસની ફ્લાઇટમાં પણ ટિશ્યૂ પર બોમ્બ લખેલું હોવાની માહિતી મળી. તપાસમાં કોઈ શંકાસ્પદ વસ્તુ મળી નહીં. 26 ઑગસ્ટ: લખનૌથી બેંગલુરુ જઈ રહેલી ઇન્ડિગોની ફ્લાઇટને પણ બોમ્બની ધમકી મળી હતી. બાદમાં આ ધમકી ખોટી હોવાનું બહાર આવ્યું.