રશિયાના કામચાટકામાં શુક્રવારે 7ની તીવ્રતાનો ભૂકંપ આવ્યો. યુરોપિયન-મેડિટેરેનિયન સિસ્મોલોજિકલ સેન્ટર (EMSC) અનુસાર, આ ભૂકંપ બપોરે 3:30 વાગ્યે આવ્યો હતો. ભૂકંપ 152 કિલોમીટરની ઊંડાઈએ આવ્યો હતો. હાલ ત્યાં સુનામીનો કોઈ ખતરો નથી. ગયા વર્ષે 30 જુલાઈના રોજ રશિયાના કામચાટકા દ્વીપકલ્પના કિનારા નજીક 8.8ની તીવ્રતાનો શક્તિશાળી ભૂકંપ આવ્યો હતો. આ 2025નો સૌથી શક્તિશાળી ભૂકંપ હતો. તેના પછી આવેલી સુનામીએ દરિયાકાંઠાના વિસ્તારોમાં તબાહી મચાવી હતી અને એક ગામનો કેટલોક ભાગ દરિયામાં વહી ગયો હતો. જાપાનમાં 9.9ની તીવ્રતાનું ખોટું એલર્ટ, 12 મિનિટમાં પાછું ખેંચાયું જાપાનની હવામાન એજન્સીએ શુક્રવારે ભૂલથી 9.9ની તીવ્રતાના ભૂકંપનું એલર્ટ જારી કરી દીધું હતું. આ ચેતવણી રશિયાના કામચાટકા દ્વીપકલ્પમાં 7.0ની તીવ્રતાનો ભૂકંપ આવ્યા બાદ જારી કરવામાં આવી હતી. જોકે, એજન્સીએ લગભગ 12 મિનિટ બાદ તેને પાછું ખેંચી લીધું હતું. જાપાન ટાઇમ્સ અનુસાર, એલર્ટ સ્થાનિક સમય મુજબ બપોરે લગભગ 12:36 વાગ્યે જારી કરવામાં આવ્યું હતું. તેમાં હોક્કાઇડોથી તોકાઈ વિસ્તાર સુધી ભારે આંચકા આવવાની ચેતવણી આપવામાં આવી હતી. NHK મુજબ, જાપાન હવામાન એજન્સીએ બપોરે 12:48 વાગ્યે ચેતવણી રદ કરી દીધી. એજન્સીએ જણાવ્યું કે ભૂકંપની તીવ્રતાનો અંદાજ જરૂર કરતાં વધુ લગાવવામાં આવ્યો હતો. 2025માં અહીં 1200થી વધુ ભૂકંપ આવ્યા હતા યુનાઇટેડ સ્ટેટ્સ જિયોલોજિકલ સર્વે (USGS)ના આંકડા અનુસાર, 2025માં કામચાટકામાં 1200થી વધુ ભૂકંપ નોંધાયા હતા. આમાંથી મોટાભાગના નાના-મોટા (મેગ્નિટ્યૂડ 2.0થી 4.0 વચ્ચેના) હતા, પરંતુ 4.0 કે તેથી વધુ તીવ્રતાના 150થી વધુ ભૂકંપ આવ્યા હતા. આ વિસ્તારમાં ગયા વર્ષે 7.0 કે તેથી વધુ તીવ્રતાના 3 મોટા ભૂકંપ નોંધાયા હતા. વર્ષ 2025નો સૌથી વિનાશક ભૂકંપ જુલાઈમાં રશિયાના કામચાટકામાં આવ્યો, જેની તીવ્રતા રિક્ટર સ્કેલ પર 8.8 માપવામાં આવી હતી. આ છેલ્લા 10 વર્ષનો સૌથી મોટો આંચકો હતો. તેનાથી ઘણા દેશો પ્રભાવિત થયા. આ ભૂકંપ સમુદ્રી વિસ્તારમાં આવ્યો હોવાથી વધુ વિનાશ થયો નહીં. કામચટકામાં વારંવાર ભૂકંપ કેમ આવે છે? કામચટકા પ્રશાંત મહાસાગરના તે વિસ્તારમાં આવેલું છે, જેને ‘રિંગ ઑફ ફાયર’ કહેવામાં આવે છે. આ પ્રશાંત મહાસાગરની આસપાસ ફેલાયેલો એવો વિસ્તાર છે, જ્યાં દુનિયામાં સૌથી વધુ ભૂકંપ આવે છે અને જ્વાળામુખીઓ ફાટે છે. કામચટકામાં વારંવાર ભૂકંપ આવવાનું મુખ્ય કારણ જમીનની નીચે રહેલી વિશાળ પ્લેટોની હિલચાલ છે. અહીં પ્રશાંત પ્લેટ ધીમે ધીમે ઓખોત્સ્ક પ્લેટની નીચે સરકી રહી છે. આ પ્રક્રિયાને સબડક્શન કહેવામાં આવે છે. બંને પ્લેટો વચ્ચેના ઘર્ષણને કારણે ખડકોમાં દબાણ એકઠું થતું રહે છે. જ્યારે આ દબાણ અચાનક બહાર નીકળે છે, ત્યારે ભૂકંપ આવે છે. પ્લેટોની આ જ હિલચાલને કારણે જમીનની નીચે ગરમ પીગળેલો પદાર્થ બને છે, જેને મેગ્મા કહેવામાં આવે છે. તે બહાર નીકળે ત્યારે જ્વાળામુખી ફાટે છે. અહીં ઘણા સક્રિય જ્વાળામુખીઓ આવેલા છે. સમુદ્રની નીચે તીવ્ર ભૂકંપ આવે ત્યારે સુનામીનો ખતરો પણ રહે છે. આ વિસ્તારમાં જમીનની નીચે પ્લેટોની હિલચાલ સતત ચાલુ રહે છે. તેથી અહીં ભવિષ્યમાં પણ ભૂકંપ આવવાની શક્યતા રહેશે.