શનિવારે સાઉદી અરેબિયાની રાજધાની રિયાધમાં કિંગ ખાલિદ ઇન્ટરનેશનલ એરપોર્ટ નજીક આગ અને કાળા ધુમાડાના ગોટેગોટા જોવા મળ્યા. સાઉદીએ પુષ્ટિ કરી છે કે યમનના હૂતી વિદ્રોહીઓએ શનિવારે સવારે રાજધાની રિયાધ પર બેલિસ્ટિક મિસાઇલથી હુમલો કરવાનો પ્રયાસ કર્યો હતો પરંતુ મિસાઇલને રસ્તામાં જ અટકાવી દેવામાં આવી હતી. ફ્લાઇટ ટ્રેકિંગ ડેટા મુજબ, ઘણી ઉડાનોમાં નોંધપાત્ર વિલંબ થયો અને કેટલીક ઉડાનો રદ કરવામાં આવી. આગ અને વિસ્ફોટોનું કારણ હજુ સ્પષ્ટ નથી. અહેવાલો અનુસાર, એરપોર્ટ નજીકની એક ઇંધણની ટાંકીમાં આગ લાગી હતી. જોકે, આગ લાગવા અને વિસ્ફોટોનું કારણ સ્પષ્ટ નથી. સોશિયલ મીડિયા પર રિયાધ એરપોર્ટના અનેક વીડિયો વાયરલ સાઉદી અને હૂતી વિદ્રોહીઓ વચ્ચે સંઘર્ષ ચાલુ હૂતીઓએ કહ્યું હતું કે તેઓ લાલ સમુદ્રમાં સાઉદીના જહાજો અને સાઉદીનું તેલ લઈ જતાં જહાજોને હજુ પણ નિશાન બનાવશે. હૂતીઓની દલીલ છે કે યમન પર સાઉદી અરેબિયાની નાકાબંધી અને સૈન્ય કાર્યવાહીના કારણે તેના જહાજોને નિશાન બનાવવું તેમનો અધિકાર છે. સાઉદી અરેબિયા અને હૂતી લડવૈયાઓ વચ્ચેનું આ યુદ્ધ વાસ્તવમાં તાકાત, સુરક્ષા અને વિસ્તારમાં પોતાના પ્રભુત્વ માટેની લડાઈ છે. હૂતીઓ યમનની સત્તા પર સંપૂર્ણ કબજો કરવા માંગે છે, જ્યારે સાઉદી અરેબિયા પોતાના પડોશમાં કોઈપણ એવા સશસ્ત્ર જૂથને સહન કરવા માંગતું નથી. સાઉદી અરેબિયા અને યમનની સરહદ એકબીજાને અડીને આવેલી છે. સાઉદી હંમેશાં ઇચ્છતું આવ્યું છે કે તેની સરહદ પર શાંતિ રહે. પરંતુ હૂતીઓ પાસે ભારે હથિયારો, મિસાઇલો અને લડાયક ડ્રોન આવી ગયા છે. સાઉદી સરકારને લાગે છે કે જો તેના ઠીક પડોશમાં આટલું આક્રમક જૂથ રહેશે, તો તેની પોતાની સુરક્ષા ક્યારેય સુનિશ્ચિત થઈ શકશે નહીં. સાઉદીને હૂતીઓ સામે એકલાએ લડવું પડી શકે છે ગયા અઠવાડિયે હૂતીઓએ યમનના પશ્ચિમ ભાગમાં લાલ સમુદ્રના કિનારે આવેલો મોટો વિસ્તાર પોતાના કબજામાં લઈ લીધો. સાઉદી અરેબિયાને આશા હતી કે અમેરિકા તેની સાથે ઊભું રહેશે. પરંતુ અમેરિકાએ અત્યાર સુધી હૂતીઓ વિરુદ્ધ સાઉદીના સમર્થનમાં કોઈ સીધી સૈન્ય કાર્યવાહી કરી નથી. અમેરિકાએ ચોક્કસપણે કહ્યું છે કે હૂતીઓની પ્રવૃત્તિઓ બાબ અલ-મંદબ જળમાર્ગમાંથી જહાજોની અવરજવર માટે ખતરો છે. અમેરિકા પહેલેથી જ ઈરાન સાથેના સંઘર્ષમાં ફસાયેલું છે. ઈરાન હૂતીઓને સમર્થન આપે છે. આવી સ્થિતિમાં જો અમેરિકા યમનમાં સીધું ઉતરે છે, તો તેના પર વધુ એક સૈન્ય મોરચાનું દબાણ વધી શકે છે. યમનમાં 500થી વધુ સરકારી લડવૈયાઓ માર્યા ગયા યમનમાં હૂતીઓ વિરુદ્ધની લડાઈમાં છેલ્લા ચાર અઠવાડિયામાં સરકાર સમર્થિત 500થી વધુ લડવૈયાઓ માર્યા ગયા છે. સરકારના સમર્થનમાં લડી રહેલા નેશનલ રેઝિસ્ટન્સ ફોર્સે આ દાવો કર્યો છે. સંગઠન અનુસાર, આ જ સમયગાળા દરમિયાન હોદેદા અને તાઈઝ પ્રાંતોમાં 1,000થી વધુ હૂતી લડવૈયાઓ પણ માર્યા ગયા છે. હૂતીઓએ આ અંગે કોઈ પ્રતિક્રિયા આપી નથી. આ દરમિયાન યમન સરકારે લાલ સમુદ્રના કિનારે વધુ સૈનિકો મોકલવાનો નિર્ણય લીધો છે. સરકારના એક અધિકારીએ ગયા અઠવાડિયે થયેલી હાર સ્વીકારતા કહ્યું કે સરકારી દળો ફરીથી આ વિસ્તારમાં પરત ફરશે.