ભારતે સંયુક્ત રાષ્ટ્ર (UN)ના એક રિપોર્ટ સામે સખત વાંધો વ્યક્ત કર્યો છે. રિપોર્ટમાં અંડરવર્લ્ડ ડોન દાઉદ ઇબ્રાહિમની ગેંગ ડી-કંપનીને ભારતમાં હાજર ગુનાહિત સંગઠન ગણાવવામાં આવ્યું હતું. ભારતે બુધવારે કહ્યું કે આ વાત ખોટી છે અને તેને સાબિત કરતી કોઈ માહિતી રિપોર્ટમાં આપવામાં આવી નથી. ભારતે કહ્યું કે આવી ભૂલોને કારણે સંયુક્ત રાષ્ટ્રની છબીને નુકસાન પહોંચે છે. ભારતે કહ્યું છે કે દાઉદ ઇબ્રાહિમ પાકિસ્તાનમાં છુપાયેલો છે. એ જ દેશ જ્યાં ઓસામા બિન લાદેન મળી આવ્યો હતો અને માર્યો ગયો હતો. આરોપ- રિપોર્ટ તૈયાર કરનારા અધિકારીએ ચીન પાસેથી 1.5 લાખ ડૉલર લીધા હતા આ રિપોર્ટ બેન સૉલે તૈયાર કર્યો હતો. તેઓ ઑસ્ટ્રેલિયાની સિડની યુનિવર્સિટીમાં આંતરરાષ્ટ્રીય કાયદાના પ્રોફેસર છે અને ઑસ્ટ્રેલિયન એકેડેમી ઑફ સોશિયલ સાયન્સિસના સભ્ય પણ છે. સૉલને મળતી આર્થિક મદદને લઈને પણ સવાલો ઊભા થયા છે. સંયુક્ત રાષ્ટ્રની કામગીરી પર નજર રાખતી બિન-સરકારી સંસ્થા યુએન વૉચે મે 2026માં એક રિપોર્ટ જાહેર કર્યો હતો. આમાં આરોપ મૂકવામાં આવ્યો હતો કે ચીનની સરકારે 2024માં સૉલને 1.5 લાખ ડૉલર આપ્યા હતા. રિપોર્ટમાં ચીનને તેમનું સૌથી મોટો આર્થિક મદદગાર ગણાવવામાં આવ્યું હતું. ભારતે કહ્યું- દાઉદ 1993થી વૉન્ટેડ, દેશ છોડીને ભાગી ગયો હતો સંયુક્ત રાષ્ટ્ર મહાસભાની ત્રીજી સમિતિની બેઠકમાં બુધવારે ભારતના પ્રતિનિધિ રઘુ પુરીએ આ મુદ્દો ઉઠાવ્યો. ભારતે રિપોર્ટના તે ભાગ પર સવાલ ઉઠાવ્યો, જેમાં કહેવામાં આવ્યું હતું કે સંયુક્ત રાષ્ટ્ર સુરક્ષા પરિષદે 2003માં અલ-કાયદા સાથેના સંબંધોને કારણે ભારતમાં હાજર ડી-કંપનીના ડોનને પોતાની પ્રતિબંધિત યાદીમાં સામેલ કર્યો હતો. રઘુ પુરીએ કહ્યું કે ડી-કંપનીને ભારતમાં હાજર સંગઠન તરીકે રજૂ કરવાથી લોકો સમક્ષ ખોટી તસવીર ઊભી થાય છે. દાઉદ ઇબ્રાહિમ અને તેની ગેંગ 1993ના મુંબઈ બોમ્બ વિસ્ફોટો સાથે જોડાયેલા કેસમાં ભારતમાં વોન્ટેડ છે. તેમણે કહ્યું કે સંયુક્ત રાષ્ટ્રની પ્રતિબંધિત યાદીમાં પણ દાઉદ સાથે જોડાયેલી માહિતી આપવામાં આવી છે. પુરી બોલ્યા- દાઉદે ભારત છોડ્યું હોવાની વાત રિપોર્ટમાં નથી પુરીએ કહ્યું કે દાઉદ 2003માં સંયુક્ત રાષ્ટ્રની યાદીમાં સામેલ કરવામાં આવ્યો તેના ઘણા સમય પહેલાં જ ભારત છોડી ચૂક્યો હતો. ત્યારબાદ વિદેશમાં રહેતા તેને અલ-કાયદા અને તેનો ચીફ ઓસામા બિન લાદેન સાથેના સંબંધોને કારણે યાદીમાં સામેલ કરવામાં આવ્યો હતો. પુરીના જણાવ્યા અનુસાર, રિપોર્ટમાં આ મહત્ત્વપૂર્ણ માહિતીનો ઉલ્લેખ કરવામાં આવ્યો નથી. આવી બેદરકારી સંયુક્ત રાષ્ટ્ર જેવી આંતરરાષ્ટ્રીય સંસ્થાને નુકસાન પહોંચાડે છે. ભારતે એમ પણ કહ્યું કે સંયુક્ત રાષ્ટ્રની યાદીમાં દાઉદના રહેવાના સ્થળ વિશે આપવામાં આવેલી માહિતી તે દેશ તરફ ઈશારો કરે છે જ્યાં ઓસામા બિન લાદેન મળી આવ્યો હતો અને માર્યો ગયો હતો. આ પાકિસ્તાનનો સંદર્ભ હતો. બિન લાદેનને 2011માં અમેરિકી સેનાએ પાકિસ્તાનના એબટાબાદમાં ઠાર માર્યો હતો. ભારતે કહ્યું- આતંકવાદને માનવાધિકારોની આડમાં યોગ્ય ઠેરવી શકાય નહીં રઘુ પુરીએ કહ્યું કે આતંકવાદને પ્રોત્સાહન આપતા દેશો હવે માનવાધિકારો અને આતંકવાદનો સામનો કરવાના નિયમોનો સહારો લઈને પોતાનાં કૃત્યોને યોગ્ય ઠેરવવાનો પ્રયાસ કરી રહ્યા છે. તેમણે કહ્યું કે માનવાધિકારોના નામે આતંકવાદ ફેલાવનારાઓ અને કટ્ટરપંથને પ્રોત્સાહન આપનારાઓને બચાવી શકાય નહીં. તેમણે કહ્યું કે આતંકવાદ અને માનવાધિકારો સાથે જોડાયેલા મુદ્દાઓ પર રિપોર્ટ તૈયાર કરતા વિશેષ અધિકારીઓ ઘણી વખત ખોટી માહિતીના આધારે રિપોર્ટ જાહેર કરી દે છે. તેમ છતાં તેમની પાસેથી કોઈ જવાબ માંગવામાં આવતો નથી. પુરીએ કહ્યું કે તેનાથી સભ્ય દેશો સામે મુશ્કેલી ઊભી થાય છે. ખોટી માહિતી ધરાવતો રિપોર્ટ જાહેર થયા બાદ તેને સુધારવાની શક્યતા ઓછી રહી જાય છે. આ પહેલાં પણ ભારત આવા રિપોર્ટોમાં રહેલી તથ્યાત્મક ભૂલો અંગે ચિંતા વ્યક્ત કરી ચૂક્યું છે. ————————