લાલપુર પોલીસે દારૂની ગેરકાયદેસર પ્રવૃત્તિઓ પર કાર્યવાહી કરી છે. ડબાસંગ-ગજણા ફાટક પાસેથી એક શખ્સને વિદેશી દારૂ અને બિયરના જથ્થા સાથે પકડવામાં આવ્યો છે. પોલીસે કુલ ₹46,200નો મુદ્દામાલ જપ્ત કર્યો છે. પેટ્રોલિંગ દરમિયાન બાતમી મળતા પોલીસે વોચ ગોઠવી હતી. ટીવીએસ જ્યુપિટર મોટરસાઇકલ પર આવતા ચેતનસિંહ સદુભા રાઠોડને રોકીને તપાસ કરતા, તેની પાસેથી 180 મિલીની દારૂની 28 બોટલ (કિંમત ₹5,600) અને 500 મિલીના કિંગફિશર બિયરના 40 ટીન (કિંમત ₹5,600) મળી આવ્યા. પોલીસે ₹5,000નો ઓપ્પો મોબાઈલ ફોન અને ₹30,000ની મોટરસાઇકલ પણ જપ્ત કરી છે. પ્રાથમિક તપાસમાં સામે આવ્યું કે દારૂનો આ જથ્થો જામનગરના અજય ગોસ્વામી પાસેથી લાવવામાં આવ્યો હતો. પોલીસે અજય ગોસ્વામીને વોન્ટેડ જાહેર કર્યો છે અને વધુ તપાસ શરૂ કરી છે. પીઆઈ એસ.પી. ગોહિલની સૂચનાથી હેડ કોન્સ્ટેબલ એમ.એન. જાડેજા, પ્રવીણભાઈ બડીયાવદરા અને દિવ્યેશભાઈ ભીંભા સહિતના સ્ટાફે આ કાર્યવાહી કરી હતી. પ્રોહિબિશન એક્ટ હેઠળ ગુનો નોંધવામાં આવ્યો છે.