વડોદરા શહેરની મધ્યમાં આવેલી સર સયાજીરાવ જનરલ (SSG) હોસ્પિટલ ફરી એકવાર વિવાદના વંટોળમાં ઘેરાઈ છે. માનવતાને શરમાવે અને ભ્રષ્ટાચારની પરાકાષ્ઠા દર્શાવતી એક અત્યંત ચોંકાવનારી ઘટના સામે આવી છે, જેમાં સ્વજનના મૃત્યુના દુ:ખમાં ડૂબેલા પરિવારજનો પાસેથી મૃતદેહના પોસ્ટમોર્ટમ અને તેને યોગ્ય રીતે પેક કરવા માટે નાણાંની માંગણી કરતો વીડિયો સોશિયલ મીડિયામાં વાઈરલ થયો છે. બોડેલીના દર્દીના સ્વજન પાસે પૈસા માંગ્યા
વાઈરલ વીડિયો અને મળતી પ્રાથમિક વિગતો અનુસાર, બોડેલીના એક પરિવારના સભ્યનું અવસાન થતાં તેમના મૃતદેહને કાયદેસરની પ્રક્રિયા માટે SSG હોસ્પિટલના પોસ્ટમોર્ટમ રૂમ ખાતે લાવવામાં આવ્યો હતો. પોસ્ટમોર્ટમની તમામ સરકારી પ્રક્રિયા પૂર્ણ થયા બાદ મૃતદેહને સન્માનપૂર્વક પરિજનોને સોંપવાનો હોય છે. જોકે, પીએમ થયા બાદ મૃતદેહને બોડેલી લઈ જવા માટે યોગ્ય રીતે પેકિંગ કરવાના ત્યાં ફરજ બજાવતા કર્મચારીએ લાચાર પરિજનો પાસેથી ₹1500ની માંગ કરી હોવાનો દાવો કરવામાં આવ્યો છે. પોતાના સ્વજનના પાર્થિવ દેહને વહેલી તકે ઘરે લઈ જવા માટે મજબૂર પરિજનોએ આખરે ₹1500 ચૂકવીને મૃતદેહ મેળવવો પડ્યો હતો. મૃતકના પરિવારજનોએ જ વીડિયો ઉતાર્યો
આ સમગ્ર ઘટનાનું હોસ્પિટલ પરિસરમાં જ મોબાઈલ કેમેરા વડે સ્ટિંગ ઓપરેશન કરવામાં આવ્યું હતું, જેનો વીડિયો સોશિયલ મીડિયા પર વાઈરલ થતાં તંત્રના દાવાઓની પોલ ખુલ્લી પડી ગઈ છે. સરકારી હોસ્પિટલોમાં મફત સારવાર અને સેવાના દાવાઓ વચ્ચે મૃતદેહના પેકિંગ માટે પૈસાની વસૂલી કરવામાં આવતી હોવાનો આ કિસ્સો ભ્રષ્ટાચારની ગંભીર સ્થિતિ છતી કરે છે. હાલમાં આ વીડિયો અંગે હોસ્પિટલ તંત્ર દ્વારા સત્તાવાર તપાસ હાથ ધરવામાં આવે ત્યારબાદ જ સત્ય હકીકત સામે આવશે. કર્મચારીને તાત્કાલિક સસ્પેન્ડ કરી દેવાયો
આ વાઈરલ વીડિયોની સત્યતા પર હોસ્પિટલ તંત્ર દ્વારા મોટો ખુલાસો કરવામાં આવ્યો છે. SSG હોસ્પિટલના અધિક્ષક ડો. રંજન ઐયરે સત્તાવાર રીતે સ્વીકાર્યું છે કે વાઈરલ વીડિયો SSG હોસ્પિટલનો જ છે. મૃતદેહ પેક કરવાના બદલામાં નાણાં ઉઘરાવનાર વ્યક્તિ હોસ્પિટલનો જ કોન્ટ્રાક્ટ ધોરણે કામ કરતો કર્મચારી છે. આ મામલે ત્વરિત અને કડક પગલાં ભરતાં રૂપિયા લેનાર કર્મચારી જગદીશ પરમારને તાત્કાલિક અસરથી સસ્પેન્ડ કરીને હોસ્પિટલમાંથી છૂટો કરી દેવામાં આવ્યો છે. હોસ્પિટલ તંત્ર દ્વારા સ્પષ્ટ કરવામાં આવ્યું છે કે, દર્દીઓના સ્વજનો પ્રત્યે આ પ્રકારનું ગેરવર્તણૂક અને ભ્રષ્ટાચાર સહન કરવામાં આવશે નહીં. RMOની અધ્યક્ષતામાં તપાસ કરાશે
આ સમગ્ર શરમજનક ઘટનાની ઊંડાણપૂર્વક તપાસ કરવા માટે હોસ્પિટલ તંત્ર દ્વારા એક વિશેષ તપાસ કમિટીની રચના કરવામાં આવી છે. આ કમિટી RMO ડો. હિતેન્દ્ર ચૌહાણની અધ્યક્ષતામાં કામ કરશે અને સમગ્ર મામલાની તપાસ રિપોર્ટ તૈયાર કરશે. આ તપાસ દરમિયાન આ શરમજનક કૃત્યમાં અન્ય કોઈ કર્મચારી કે અધિકારીની સંડોવણી છે કે નહીં તે અંગે પણ ઝીણવટભરી તપાસ કરવામાં આવશે.