વલસાડ જિલ્લામાં નવરાત્રીનો પર્વ ઉત્સાહથી ઉજવાઈ રહ્યો છે. ખેલૈયાઓ ગરબા ગ્રાઉન્ડ્સ પર ગરબે ઘૂમી રહ્યા છે. ત્યારે મહિલાઓ અને ખેલૈયાઓની સુરક્ષા માટે વલસાડ પોલીસે ખાસ તૈયારી કરી છે. DySP ભાર્ગવ પંડ્યાએ જણાવ્યું કે, નવરાત્રીમાં કાયદો અને વ્યવસ્થા જાળવવા પોલીસ કાફલો સતત કાર્યરત છે. અધિકારીઓ વાહનો અને મોટરસાયકલ પર સતત પેટ્રોલિંગ કરી રહ્યા છે. ગરબા સ્થળોએ પોલીસ ટીમો નિયમિત મુલાકાત લઈ રહી છે. મહિલાઓ અને યુવતીઓની સુરક્ષા માટે ખાસ ‘શી ટીમ’ તૈનાત કરાઈ છે. આ ટીમની મહિલા પોલીસ યુનિફોર્મ ઉપરાંત ખાનગી કપડાંમાં પણ ગરબા સ્થળો પર હાજર રહે છે. ગરબા ગ્રાઉન્ડ પર કોઈ રોમિયો કે અસામાજિક તત્વો મહિલાઓની છેડતી કરશે તો તેમની સામે કડક કાર્યવાહી કરાશે. ‘શી ટીમ’ અને સિવિલ ડ્રેસમાં રહેલી પોલીસ આવી પ્રવૃત્તિઓ પર નજર રાખી શંકાસ્પદ વ્યક્તિ સામે કાયદેસરની કાર્યવાહી કરાશે. વલસાડ પોલીસ માઈ ભક્તો અને ખેલૈયાઓ શાંતિપૂર્ણ, સુરક્ષિત માહોલમાં નવરાત્રી ઉજવી શકે તે માટે 24 કલાક સેવા આપી રહી છે.