વેરાવળ-પાટણ સંયુક્ત પાલિકાએ શહેરમાં સ્વચ્છતા માટે લોકોની ભાગીદારી વધારવા ‘સ્વચ્છતા સંકલ્પ અભિયાન’ શરૂ કર્યું છે. આ અભિયાનમાં NULM હેઠળ કામ કરતી સખી મંડળની બહેનો શહેરના અલગ-અલગ વિસ્તારોમાં ઘરે-ઘરે જશે. તેઓ નાગરિકોને સ્વચ્છતા વિશે જાગૃત કરશે અને સંકલ્પ પત્ર ભરાવશે. ખાસ કરીને, ઘરેથી નીકળતા ભીના અને સૂકા કચરાને અલગ રાખવા અને પાલિકાના નક્કી કરેલા વાહનમાં જ કચરો આપવા વિશે લોકોને સમજાવવામાં આવશે. પાલિકા વિસ્તારમાં Cleanliness Target Unit (CTU) તરીકે પસંદ કરાયેલા વિસ્તારોમાં સખી મંડળની બહેનો નિયમિત મુલાકાત લેશે. ઘરે-ઘરે સંપર્ક કરીને નાગરિકોને કચરાના યોગ્ય મેનેજમેન્ટ વિશે જરૂરી સૂચનો અને માર્ગદર્શન આપશે. ભીનો અને સૂકો કચરો અલગ રાખવો એ સ્વચ્છતાની મહત્વની કડી છે, તે લોકોને સરળતાથી સમજાવવામાં આવશે.
પાલિકા પ્રમુખ નરેશ ગોહેલે જણાવ્યું કે, આ અભિયાનનો એક મહત્વનો ભાગ ‘સ્વચ્છતા સંકલ્પ પત્ર’ છે. સખી મંડળની બહેનો નાગરિકોના ઘરે જઈ સંકલ્પ પત્ર ભરાવશે. તેઓ શહેરને સ્વચ્છ રાખવા માટે વ્યક્તિગત જવાબદારી અંગે સંકલ્પ લેવડાવશે. આ સંકલ્પમાં ઘરનો કચરો અલગ કરીને આપવો, જાહેર સ્થળોએ કચરો ન ફેંકવો, પાલિકાના નક્કી કરેલા વાહનમાં જ કચરો આપવો અને સિંગલ યુઝ પ્લાસ્ટિકનો ઉપયોગ ઘટાડવા જેવા મુદ્દાઓ સામેલ છે.
આ ઉપરાંત, ઘર અને આસપાસનો વિસ્તાર સ્વચ્છ રાખવા વિશે પણ સમજાવવામાં આવશે. અન્ય લોકોને પણ સ્વચ્છતા માટે પ્રેરણા આપવા અને સફાઈ મિત્રોના કામને માન આપી મદદ કરવા અંગે પણ નાગરિકોને કહેવામાં આવશે.
જો જાહેર સ્થળો, બજાર વિસ્તાર અને શેરીઓમાં ગંદકી કે કચરાના ઢગલા દેખાય, તો તેની માહિતી પાલિકાના સંબંધિત વિભાગ સુધી પહોંચાડવામાં આવશે. સાથે જ, સિંગલ યુઝ પ્લાસ્ટિકનો ઉપયોગ ઘટાડવા અને ફરી વાપરી શકાય તેવી વસ્તુઓ વાપરવા માટે પણ લોકોમાં જાગૃતિ લાવવામાં આવશે. પાલિકા પ્રમુખ ગોહેલે નાગરિકોને અપીલ કરી કે, આ અભિયાનમાં પાલિકા તંત્ર સાથે સ્થાનિક સખી મંડળની બહેનોની સીધી ભાગીદારીથી સ્વચ્છતાનો સંદેશ ઘરે-ઘરે પહોંચાડવાનો પ્રયાસ થયો છે. પાલિકાનો હેતુ માત્ર સફાઈ કરાવવાનો નથી, પરંતુ નાગરિકોને સ્વચ્છતા વ્યવસ્થામાં સક્રિય રીતે ભાગ લેનારા બનાવવાનો છે.