વેરાવળ-સોમનાથ યુવા ભાજપ દ્વારા નવરાત્રિ પર્વ પૂર્વે નિઃશુલ્ક ગરબા ક્લાસિસનો શુભારંભ કરવામાં આવ્યો છે. મહાદેવ એન્ડ અષ્ટવિનાયક ગરબા ક્લાસિસના સહયોગથી શહેરના ભાઈઓ, બહેનો અને બાળકો માટે આ ક્લાસિસ 29 ઓગસ્ટ, 2026થી શરૂ થયા છે. વેરાવળના 60 ફૂટ રોડ પર સનરાઇઝ સ્કૂલ સામે આવેલા સ્પોટ કોમ્પ્લેક્સ ખાતે આ ક્લાસિસ યોજાઈ રહ્યા છે. 7 વર્ષથી ઉપરના બાળકો, યુવક-યુવતીઓ અને વડીલોને પણ અહીં વિનામૂલ્યે તાલીમ આપવામાં આવી રહી છે. આયોજકોના જણાવ્યા અનુસાર, નવી પેઢીને ગુજરાતી લોકસંસ્કૃતિ અને પરંપરાગત ગરબા સાથે જોડવાના ઉદ્દેશ્યથી આ પહેલ કરવામાં આવી છે. આધુનિક યુગમાં નવી પેઢીને ભારતીય અને ગુજરાતી સંસ્કૃતિ સાથે જોડી રાખવી મહત્વપૂર્ણ છે. ગરબા ગુજરાતની આગવી ઓળખ અને લોકસંસ્કૃતિનો અભિન્ન અંગ છે. આ તાલીમ વર્ગોનો હેતુ બાળકો અને યુવાનોમાં પરંપરાગત ગરબાની તાલ, લય અને વિવિધ શૈલીઓ પ્રત્યે રસ કેળવવાનો છે, જેથી તેઓ નવરાત્રિની સાંસ્કૃતિક પરંપરાને સમજી શકે. આ ગરબા ક્લાસિસનો શુભારંભ નગરપાલિકા પ્રમુખ નરેશ ગોહેલના હસ્તે કરવામાં આવ્યો હતો. આ પ્રસંગે ભાજપ પરિવારના વિવિધ પદાધિકારીઓ, નગરસેવકો, શક્તિ કેન્દ્ર સંયોજકો, બૂથ પ્રમુખો અને કાર્યકર્તાઓ ઉપસ્થિત રહી આયોજકોને શુભેચ્છાઓ પાઠવી હતી. ઉપસ્થિત મહાનુભાવોએ જણાવ્યું હતું કે, નવરાત્રિ માત્ર ઉત્સવ નથી, પરંતુ આપણી સંસ્કૃતિ, પરંપરા અને સામૂહિક એકતાનું પર્વ છે. તેમણે નવી પેઢીને ગરબાની મૂળ પરંપરા સાથે જોડાઈ પોતાની સાંસ્કૃતિક ઓળખ જાળવી રાખવા અને આ નિઃશુલ્ક ગરબા ક્લાસિસનો મહત્તમ લાભ લેવા અપીલ કરી હતી.