આજે કૃષ્ણ જન્માષ્ટમીના પાવન પર્વ નિમિત્તે દ્વારકા, ડાકોર અને શામળાજી સહિત સમગ્ર રાજ્યના હરિધામોમાં ભવ્ય મહોત્સવનો પ્રારંભ થઈ ચૂક્યો છે. વહેલી સવારથી જ શામળાજી ખાતે મંગળા આરતી, પંચામૃત અભિષેક અને જળાભિષેક સાથે ભક્તિમય વાતાવરણ સર્જાયું છે. દ્વારકામાં ભગવાનને ખુલ્લા પડદે સ્નાન કરાવવા સહિત શામળાજીમાં 100થી વધુ મટકી ફોડ કાર્યક્રમો અને ડાકોરમાં દ્વારકા જેવા અદ્ભુત માહોલ વચ્ચે દેશ-વિદેશમાંથી લાખો શ્રદ્ધાળુઓ ઉમટી પડ્યા છે. વધતી ભીડને ધ્યાનમાં રાખીને તમામ યાત્રાધામોમાં તંત્ર દ્વારા સુરક્ષા, આરોગ્ય અને પાર્કિંગની ચુસ્ત વ્યવસ્થા ગોઠવવામાં આવી છે. દિવસભર ચાલનારા વિવિધ ધાર્મિક અનુષ્ઠાનો અને વિશેષ મનોરથો વચ્ચે હવે તમામ ભક્તો રાત્રિના સમયની આતુરતાપૂર્વક રાહ જોઈ રહ્યા છે. બરાબર મધરાતે 12 વાગ્યે કાનુડાનો જન્મ થશે, જે ક્ષણે ‘નંદ ઘેર આનંદ ભયો, જય કનૈયા લાલ કી’ના ગગનભેદી જયઘોષ સાથે સમગ્ર મંદિર પરિસરો ગુંજી ઊઠશે. મધરાતે જન્મની વિશેષ વિધિ પૂર્ણ થયા બાદ ભક્તોને ભગવાન બાળસ્વરૂપના આકર્ષક શણગાર અને ઝાંખીના દર્શનનો લાભ મળશે, જેના માટે સમગ્ર કૃષ્ણનગરીઓ શ્રદ્ધા અને ઉત્સાહના અનોખા રંગે રંગાઈ ગઈ છે. ગ્રાફિક્સથી સમજો કૃષ્ણજન્મોત્સવનો સમગ્ર કાર્યક્રમ