વડોદરા શહેરમાં સાયબર ફ્રોડના અલગ અલગ બે કિસ્સાઓ પ્રકાશમાં આવ્યા છે. જેમાં સાયબર ઠગોએ ક્રેડિટ કાર્ડ અપડેટ અને વોટ્સએપ હેકિંગના નામે બે અલગ-અલગ બનાવમાં રૂપિયા 3.27 લાખોની ઠગાઈ આચરતા બે પોલીસ મથકમાં અલગ અલગ ફરિયાદ નોંધાવી છે. પ્રથમ ઘટનામાં, હાલોલની સરકારી આયુર્વેદ હોસ્પિટલમાં મેડિકલ ઓફિસર તરીકે ફરજ બજાવતા અને વડોદરાના સોમાતળાવ વિસ્તારમાં રહેતા ડૉ. દિગ્વિજયસિંહ પ્રવિણસિંહ ગઢવી સાથે ઠગાઈ આચરવામાં આવી હોવાનો કિસ્સો સામે આવ્યો છે. તેઓને એક અજાણ્યા નંબર પરથી ફોન કરનારે ઇન્ડસઇન્ડ બેંકના ક્રેડિટ કાર્ડની પ્રોટેક્શન ફી માફ કરવાના બહાને indusrewards.web.app વેબસાઈટ ઓપન કરાવડાવી હતી. ઠગોએ ક્રેડિટ કાર્ડની વિગતો મેળવીને ઓટીપી દ્વારા કારેટલેન પરથી કુલ રૂ.1,92,876ની રકમ ઉપાડી લીધી હતી. જ્યારે બીજા બનાવમાં, મકરપુરા વિસ્તારના જાંબુઆ ખાતે રહેતા 69 વર્ષીય ખેડૂત હસમુખભાઈ ચીમનભાઈ પટેલ સાયબર ઠગાઈનો ભોગ બન્યા છે. તેમના મિત્રના વોટ્સએપ પરથી એનિવર્સરીની ફાઇલ આવ્યા બાદ ફોન હેંગ થઈ ગયો હતો અને તમામ સંપર્કોને મેસેજ ચાલ્યા ગયા હતા. ત્યારબાદ બે બેંકના ખાતામાંથી ખાતામાંથી વેલસન નામના વ્યક્તિના નામે કુલ રૂ.1,95,00 ની રકમ ગેરકાયદેસર રીતે ટ્રાન્સફર થઈ ગઈ હતી. બંને વ્યક્તિઓએ આ બનાવ અંગેની જાણ નેશનલ સાયબર હેલ્પલાઈન નંબર 1930 પર ફોન કરી ઓનલાઇન ફરિયાદો નોંધાવી હતી. જેના આધારે પોલીસ દ્વારા આ મામલે આગળની તપાસ હાથ ધરવામાં આવી છે.