સુરત મહાનગરપાલિકા સંચાલિત પ્રતિષ્ઠિત સ્મીમેર મેડિકલ કોલેજ અને હોસ્પિટલ પોતાની સફળ સ્થાપનાના 25 વર્ષ પૂર્ણ કરવા જઈ રહી છે. આરોગ્ય સેવા અને તબીબી શિક્ષણક્ષેત્રે સુરતનું નામ રોશન કરનાર આ સંસ્થાન દ્વારા 25 વર્ષની આ ઐતિહાસિક સિદ્ધિ નિમિત્તે ભવ્ય ‘સિલ્વર જ્યુબિલી મહોત્સવ’ ઉજવવાનું આયોજન કરાયું છે. ઉજવણીનો તમામ ખર્ચ અને સંચાલન મનપા હસ્તક
શરૂઆતમાં સ્મીમેરના તબીબો, પ્રોફેસરો અને સ્ટાફ સભ્યો પોતાના અંગત સ્તરે ફાળો એકત્રિત કરીને આ કાર્યક્રમની ઉજવણી કરવાની યોજના બનાવી રહ્યા હતા. જોકે, આ બાબતની જાણ સુરત મહાનગરપાલિકાના શાસકો અને ઉચ્ચ અધિકારીઓને થતાં જ તાત્કાલિક નિર્ણય લેવામાં આવ્યો હતો કે આ ગૌરવપૂર્ણ પ્રસંગની સમગ્ર ઉજવણીનો તમામ ખર્ચ અને સંચાલન મનપા તંત્ર દ્વારા જ ઉઠાવવામાં આવશે. MBBSની 100 બેઠકોથી 250 સુધીની શાનદાર સફર
સ્મીમેર કોલેજની શૈક્ષણિક પ્રગતિ વિશે વાત કરીએ તો, શૈક્ષણિક વર્ષ 1999-2000માં સ્નાતક (MBBS) ની માત્ર 100 બેઠકો સાથે કોલેજની શરૂઆત થઈ હતી. સમય સાથે તબીબી સુવિધાઓ વધતા વર્ષ 2008માં 50 બેઠકો વધીને 150 થઈ હતી. ત્યારબાદ શૈક્ષણિક વર્ષ 2019-20માં વધુ 50 બેઠકોનો વધારો થતાં 200 અને શૈક્ષણિક વર્ષ 2022-23માં ફરી 50 બેઠકો ઉમેરાતા હાલમાં સ્મીમેર ખાતે MBBS ની કુલ 250 મંજૂર બેઠકો ઉપલબ્ધ છે. અનુસ્નાતક (MD/MS) વિભાગમાં બેઠકો વધીને 171 થઈ
તબીબી શિક્ષણમાં વિશેષજ્ઞતા વધારવા માટે વર્ષ 2007થી સ્મીમેર ખાતે અનુસ્નાતક અભ્યાસક્રમ (MD/MS) શરૂ કરવામાં આવ્યો હતો. પ્રારંભિક તબક્કે અનુસ્નાતકમાં 36 બેઠકો માટે પ્રવેશ મંજૂરી મળી હતી. ઉત્તરોત્તર આધુનિક સાધન-સામગ્રી, નિષ્ણાત ફેકલ્ટી અને ક્લિનિકલ સેટઅપ વિસ્તરતાં હાલમાં અનુસ્નાતક વિભાગની બેઠકોનો આંકડો વધીને 171 સુધી પહોંચી ચૂક્યો છે. ઓડિટોરિયમ અને ઇન્ડોર સ્ટેડિયમ ખાતે રંગારંગ કાર્યક્રમોનું આયોજન
સિલ્વર જ્યુબિલી મહોત્સવની આ ઉજવણીને યાદગાર બનાવવા માટે શહેરના અગ્રણી સાંસ્કૃતિક હોલમાં વિવિધ કાર્યક્રમોનું આયોજન કરવામાં આવ્યું છે: 25 વર્ષની સેવાની અવિરત સફરને ભવ્ય બનાવવા માટે પાલિકા તંત્ર અને સમગ્ર સ્મીમેર પરિવાર દ્વારા તડામાર તૈયારીઓ શરૂ કરી દેવામાં આવી છે.