હિંમતનગરમાં રામદેવપીર મહારાજનો નેજા ઉત્સવ શ્રદ્ધા અને ઉલ્લાસપૂર્વક ઉજવાયો. આ પ્રસંગે ભાટવાસમાં આવેલા જોગણી માતાજીના મંદિરથી રામદેવપીર મહારાજનો વરઘોડો શરૂ થયો. આ ભક્તિમય વરઘોડો ભાટવાસ જોગણી માતાના મંદિરથી નીકળીને શહેરના મુખ્ય રસ્તાઓ પર ફર્યો. તેમાં ટાવર રોડ, સિવિલ સર્કલ રોડ, ગિરધરનગર રોડ, કાટવાડ રોડ અને ચંદ્રનગર રોડનો સમાવેશ થાય છે. આખરે વરઘોડો મોતીપુરામાં આવેલા રામાપીરના મંદિરે પહોંચ્યો. વરઘોડામાં ભાટ સમાજ દ્વારા 100થી વધુ નેજા સાથે શોભાયાત્રા કાઢવામાં આવી હતી. મોતીપુરામાં આવેલા રામદેવપીરના મંદિરે અન્ય સમાજના શ્રદ્ધાળુઓએ પણ 100થી વધુ નેજા ચડાવ્યા હતા. કુલ મળીને 200થી વધુ નેજા ચડાવવામાં આવ્યા હતા. આ ધાર્મિક ઉત્સવમાં ભાટ સમાજના લોકોની સાથે અન્ય ઘણા સમાજના શ્રદ્ધાળુઓ પણ મોટી સંખ્યામાં હાજર રહ્યા હતા. સૌએ રામદેવપીર મહારાજના દર્શન કરીને ધન્યતા અનુભવી. આખા રસ્તા પર “જય રામાપીર”ના નાદથી વાતાવરણ ભક્તિમય બની ગયું.