સાબરકાંઠા જિલ્લાના હિંમતનગરમાં વ્યસનમુક્તિ અંગે જનજાગૃતિ ફેલાવવા માટે શ્રી સ્વામિનારાયણ ગુરુકુલ રાજકોટ સંસ્થાનની હિંમતનગર શાખા દ્વારા એક રેલીનું આયોજન કરાયું હતું. શહેરના કેનાલ ફ્રન્ટથી નીકળેલી આ રેલીને ધારાસભ્ય વી.ડી. ઝાલા, પાલિકા પ્રમુખ અરુણાબેન કડિયા અને ઉપપ્રમુખ ગોપાલસિંહ રાઠોડે પ્રસ્થાન કરાવ્યું. આ રેલીમાં ગુરુકુલના પ્રિન્સિપાલ અને વિદ્યાર્થીઓ જોડાયા હતા. વિવિધ બેનરો સાથે લોકોને તમાકુ, દારૂ જેવા વ્યસનોથી દૂર રહેવા અને સ્વસ્થ જીવન અપનાવવા અપીલ કરાઈ. આ સંદેશ શહેર અને ગ્રામ્ય વિસ્તારો સુધી પહોંચાડવાનો પ્રયાસ કરાયો. હાંસલપુર ખાતે પણ વ્યસનમુક્તિના સંદેશ સાથે રેલી યોજાઈ હતી. ગુરુકુલના વિદ્યાર્થીઓએ વ્યસનોથી દૂર રહેવા અને સમાજમાં જાગૃતિ ફેલાવવા પ્રતિજ્ઞા લીધી. આ પહેલનો હેતુ યુવાનોમાં સારા સંસ્કારનું સિંચન અને વ્યસનમુક્ત સમાજનું નિર્માણ કરવાનો હતો.