હોર્મુઝ સ્ટ્રેટમાંથી પસાર થઈ રહેલા કુવૈતના ધ્વજવાળા ઓઈલ ટેન્કર M/T અલ દસમા પર બુધવારે અજાણ્યા પ્રોજેક્ટાઈલથી હુમલો કરવામાં આવ્યો હતો. જહાજ પર 21 ભારતીય નાવિકો સહિત અન્ય ક્રૂ મેમ્બરો પણ સવાર હતા. હુમલા બાદ ટેન્કરમાં આગ લાગી હતી, જેને બાદમાં બુઝાવી દેવામાં આવી. તમામ ભારતીય નાવિકો અને અન્ય ક્રૂ મેમ્બરો સુરક્ષિત છે. ઓક્ટોબરમાં ભારતીય નાવિકોવાળા જહાજો પર હુમલાની આ પાંચમી ઘટના છે. આ હુમલાઓમાં અત્યાર સુધીમાં 11 ભારતીયો ઘાયલ થયા છે અને 2 ભારતીયો ગુમ છે. વેપારી જહાજોની સુરક્ષા અંગે ભારતે ચિંતા વ્યક્ત કરી પશ્ચિમ એશિયામાં વધતા સંઘર્ષ વચ્ચે ભારતે વેપારી જહાજો અને તેના પર કામ કરતા નાવિકો પર થતા હુમલાઓ અંગે અનેક વખત ચિંતા વ્યક્ત કરી છે. ભારતે વેપારી જહાજો પરના હુમલાઓને કાનૂની અને નૈતિક, બંને દૃષ્ટિકોણથી ખોટા ગણાવ્યા છે. સરકારનું કહેવું છે કે સમુદ્રમાં કામ કરતા નાવિકોની સુરક્ષા અને દરિયાઈ માર્ગો પરથી જહાજોની અવરજવરની આઝાદી જાળવી રાખવી જરૂરી છે. વિદેશ મંત્રાલયે જહાજો પરના હુમલા તાત્કાલિક રોકવાની અપીલ કરી વિદેશ મંત્રાલયે વેપારી જહાજો, નાવિકો અને સામાન્ય લોકો દ્વારા ઉપયોગમાં લેવાતા માળખા પરના હુમલા તાત્કાલિક રોકવાની અપીલ કરી છે. મંત્રાલયે આંતરરાષ્ટ્રીય જળમાર્ગો પરથી વેપારી જહાજોની સુરક્ષિત અને અવરોધરહિત અવરજવર સુનિશ્ચિત કરવા પર પણ ભાર મૂક્યો છે. સરકારના જણાવ્યા અનુસાર, ભારતીય નાવિકોને લગતી ઘટનાઓ પર સતત નજર રાખવામાં આવી રહી છે. આ માટે જહાજોનું સંચાલન કરતી કંપનીઓ સાથે સંપર્ક જાળવી રાખવામાં આવી રહ્યો છે, જેથી નાવિકોની સુરક્ષા સુનિશ્ચિત કરી શકાય. હોર્મુઝમાં દરિયાઈ બારૂદી સુરંગ સાથે અથડાઈને જહાજ ડૂબ્યું હોર્મુઝ સ્ટ્રેટમાં એક જહાજ દરિયાઈ બારૂદી સુરંગ સાથે અથડાઈને ડૂબી ગયું. જહાજમાં 2500 કન્ટેનર હતા. ઈરાનના રિવોલ્યુશનરી ગાર્ડ્સ (IRGC)એ 14 ઓક્ટોબરે આ માહિતી આપી હતી. APના અહેવાલ મુજબ, અથડાયા બાદ જહાજમાં આગ લાગી હતી. રોયટર્સના જણાવ્યા અનુસાર ડૂબી ગયેલા જહાજનું નામ GFS પ્રાઇડ છે. તે સિંગાપોરના ધ્વજ હેઠળ સંચાલિત થઈ રહ્યું હતું અને તેમાં એક સમયે 2,824 કન્ટેનર લઈ જવાની ક્ષમતા હતી. જહાજનું સંચાલન UAEની એક કંપની પાસે હતું. યુદ્ધ શરૂ થયા બાદ આ પહેલી વાર છે, જ્યારે કોઈ જહાજ બારૂદી સુરંગ સાથે અથડાઈને ડૂબ્યું છે. યુદ્ધ બાદ હોર્મુઝથી જહાજોની અવરજવર ઘટી અમેરિકા અને ઇઝરાયલે 28 ફેબ્રુઆરી 2026ના રોજ ઈરાન પર હુમલા શરૂ કર્યા ત્યારથી હોર્મુઝની ખાડીમાં જહાજોની અવરજવરને અસર થઈ છે. ઈરાને આ દરિયાઈ માર્ગ પરથી પસાર થતાં જહાજો પર પ્રતિબંધો મૂક્યા છે અને અનેક જહાજો પર હુમલા પણ થયા છે. તેના કારણે ઘણી શિપિંગ કંપનીઓ આ માર્ગ પરથી જહાજો મોકલવાનું ટાળી રહી છે. રોયટર્સ અનુસાર, 7 ઑક્ટોબરે હોર્મુઝમાંથી માત્ર 7 માલવાહક જહાજો પસાર થયાં હતાં. જોકે, આ માર્ગ પરથી જહાજોની અવરજવર સંપૂર્ણપણે બંધ થઈ નથી. કેટલાક જહાજો હજુ પણ પસાર થઈ રહ્યાં છે, પરંતુ યુદ્ધ પહેલાંની સરખામણીએ તેમની સંખ્યા ઘણી ઓછી છે. આ સમાચાર પણ વાંચો… હોર્મુઝમાં ભારતીય જહાજ પર ઈરાની હુમલાનો VIDEO:IRGC બોટ્સે ફાયરિંગ કર્યું; કાચ તૂટ્યા, સામાન વેરવિખેર થયો, 21 નાવિકોએ સંતાઈને જીવ બચાવ્યો હોર્મુઝ સ્ટ્રેટમાં 21 ભારતીય નાવિકોવાળા એક કન્ટેનર જહાજ પર ઈરાની નૌકાઓએ ફાયરિંગ કર્યું હતું. આ ઘટના 22 એપ્રિલે બની હતી. ભારતીય નાવિકોના સંગઠને હવે આ ઘટનાનો વીડિયો જાહેર કર્યો છે. વીડિયોમાં ઈરાની રિવોલ્યુશનરી ગાર્ડ્સ (IRGC) સાથે સંકળાયેલી નૌકાઓને જહાજની આસપાસ જોઈ શકાય છે. જહાજ પર ફાયરિંગ બાદ કાચ તૂટેલા અને સામાન વેરવિખેર થયેલો દેખાય છે. એક જગ્યાએ રોકેટ-પ્રોપેલ્ડ ગ્રેનેડ ઝીંકવામાં આવ્યા હોવાનું દૃશ્ય પણ દેખાય છે. હુમલા દરમિયાન જહાજના ક્રૂ પોતાનો જીવ બચાવવા માટે અંદર સંતાઈ ગયા હતા. જહાજ પર 21 ભારતીય નાવિકો સવાર હતા અને બધા સુરક્ષિત રહ્યા હતા. સંપૂર્ણ સમાચાર વાંચો…