હોર્મુઝ સ્ટ્રેટમાં બારૂદી સુરંગ સાથે અથડાઈને એક માલવાહક જહાજ ડૂબી ગયું. જહાજમાં 2,500 કન્ટેનર હતાં. ઈરાનની રિવોલ્યુશનરી ગાર્ડ્સ (IRGC)એ બુધવારે આ માહિતી આપી. APના અહેવાલ મુજબ, યુદ્ધ શરૂ થયા બાદ પહેલીવાર એવું કહેવામાં આવ્યું છે કે બારૂદી સુરંગ સાથે અથડાઈને કોઈ જહાજ ડૂબ્યું છે. બારૂદી સુરંગ સાથે અથડાયા બાદ જહાજમાં આગ લાગી હતી. હાલ જહાજના ક્રૂ વિશે કોઈ માહિતી સામે આવી નથી. IRGCએ કહ્યું- જહાજ જોખમી માર્ગ પરથી જઈ રહ્યું હતું IRGC એ બુધવારે જણાવ્યું કે જહાજ હોર્મુઝ નજીક એવા માર્ગ પરથી પસાર થઈ રહ્યું હતું, જેના ઉપયોગની મંજૂરી નહોતી અને આ માર્ગ જોખમી હતો. જહાજનું નામ અને તે ક્યાંથી ક્યાં જઈ રહ્યું હતું, તેની માહિતી આપવામાં આવી નથી. જહાજ પર કેટલા લોકો સવાર હતા અને આ ઘટનામાં કોઈનું મૃત્યુ થયું છે કે નહીં, તે પણ સ્પષ્ટ નથી. IRGCએ કહ્યું- કન્ટેનરોથી દૂર રહો ઘટના બાદ IRGCએ સ્થાનિક જહાજો અને માછીમારોને સાવચેત રહેવા જણાવ્યું છે. તેણે સમુદ્રમાં તરતા કન્ટેનરોથી દૂર રહેવાની અપીલ કરી છે. આ કન્ટેનરો અન્ય જહાજો માટે જોખમરૂપ બની શકે છે અને દરિયાઈ માર્ગ પરની અવરજવરમાં અવરોધ ઊભો કરી શકે છે. હોર્મુઝ સ્ટ્રેટ પર્શિયન ખાડીને ઓમાનની ખાડી સાથે જોડે છે. આ દુનિયાના સૌથી મહત્વપૂર્ણ દરિયાઈ માર્ગોમાંનો એક છે. અહીંથી મોટી માત્રામાં કાચું તેલ અને અન્ય સામાન લઈ જતા જહાજો પસાર થાય છે. આ વિસ્તારમાં જહાજોની સુરક્ષાને લઈને પહેલેથી જ ચિંતા જોવા મળી રહી છે. હોર્મુઝમાં મંગળવારે 2 જહાજો પર હુમલો થયો હતો બ્રિટનની દરિયાઈ સુરક્ષા દેખરેખ એજન્સી UKMTOના જણાવ્યા અનુસાર, મંગળવારે હોર્મુઝ જળમાર્ગમાં બે વેપારી જહાજો પર અજાણી વસ્તુઓથી હુમલો થયો હતો. બંને જહાજોને નજીવું નુકસાન થયું, પરંતુ કોઈના ઘાયલ થવાના અહેવાલ નથી. હુમલા બાદ પણ બંને જહાજો પોતાની સફર ચાલુ રાખવામાં સફળ રહ્યા. એજન્સીએ હુમલાઓમાં કઈ વસ્તુનો ઉપયોગ કરવામાં આવ્યો હતો તે જણાવ્યું નથી. યુદ્ધ બાદ હોર્મુઝમાંથી જહાજોની અવરજવર ઘટી અમેરિકા અને ઇઝરાઈલે 28 ફેબ્રુઆરી 2026ના રોજ ઈરાન પર હુમલા શરૂ કર્યા બાદથી હોર્મુઝ જળમાર્ગમાં જહાજોની અવરજવર પ્રભાવિત થઈ છે. ઈરાને આ દરિયાઈ માર્ગ પરથી પસાર થતાં જહાજો પર પ્રતિબંધો મૂક્યા છે અને અનેક જહાજો પર હુમલા પણ થયા છે. તેના કારણે ઘણી શિપિંગ કંપનીઓ આ માર્ગે જહાજો મોકલવાનું ટાળી રહી છે. રોયટર્સ અનુસાર, 7 ઑક્ટોબરે હોર્મુઝમાંથી માત્ર 7 માલવાહક જહાજો પસાર થયા હતા. જોકે, આ માર્ગે જહાજોની અવરજવર સંપૂર્ણપણે બંધ થઈ નથી. કેટલાક જહાજો હજુ પણ પસાર થઈ રહ્યા છે, પરંતુ યુદ્ધ પહેલાંની સરખામણીમાં તેમની સંખ્યા ઘણી ઓછી છે.