પોરબંદર એલ.સી.બી. ટીમે જુનાગઢમાંથી ચોરાયેલી એક અતુલ કંપનીની નાની રીક્ષા સાથે એક આરોપીને ઝડપી પાડ્યો છે. એલ.સી.બી.ના પેટ્રોલિંગ દરમિયાન આ ચોરીનો ભેદ ઉકેલાયો હતો. ઝડપાયેલા આરોપીનું નામ વીકી બટુકભાઈ મકવાણા (ઉંમર ૩૦, રહે. ખાપટ, પોરબંદર) છે. પોલીસ સૂત્રો પાસેથી મળતી માહિતી મુજબ, એલ.સી.બી. સ્ટાફ ખાપટ રોડ પર પેટ્રોલિંગ કરી રહ્યો હતો ત્યારે શંકાસ્પદ રીતે એક નાની રીક્ષા લઈને આવતો ઇસમ નજરે પડ્યો હતો. પોલીસે તેને અટકાવી રીક્ષાના રજીસ્ટ્રેશન કાગળો અને માલિકીના આધાર પુરાવા માંગતા તે રજૂ કરી શક્યો ન હતો. આથી પોલીસે સઘન તપાસ હાથ ધરી હતી અને રીક્ષા સાથે આરોપીને પકડી પાડ્યો હતો. આ રીક્ષાની બજાર કિંમત આશરે રૂ. ૫૦,૦૦૦/- અંદાજવામાં આવી છે. વધુ તપાસમાં સામે આવ્યું કે આ રીક્ષા જુનાગઢ બી-ડિવીઝન પોલીસ સ્ટેશનમાં નોંધાયેલી ચોરીના ગુના સાથે સંબંધિત હતી. જુનાગઢ પોલીસે આ અંગે ગુનો નંબર PART A-11203024250864/2025 હેઠળ નોંધ્યો હતો. પોલીસ તપાસ દરમિયાન એ પણ જાણવા મળ્યું કે રીક્ષા ચોરી કરતી વખતે વીકી મકવાણા સાથે તેનો ભાઈ ઉમેશ બટુકભાઈ મકવાણા પણ જોડાયેલો હતો. સ્થાનિક નાગરિકોના જણાવ્યા અનુસાર, વીકી બટુકભાઈ મકવાણા અને તેનો ભાઈ ઉમેશ બટુકભાઈ મકવાણા જુનાગઢના સાબર પુલ પાસે આવેલા પુનમ કારખાનામાંથી રીક્ષા ચોરીના પ્રયાસમાં સંડોવાયેલા હતા. આરોપીઓની પૂછપરછ બાદ તેમણે પોતાના ગુનાની કબૂલાત કરી હતી અને ચોરી અંગે વિગતવાર માહિતી આપી હતી. ચોરીમાં વપરાયેલી રીક્ષાને ઉદ્યોગનગર પોલીસ સ્ટેશનને સોંપી દેવામાં આવી છે. આ ગુનાની વધુ તપાસ માટે જુનાગઢ બી-ડિવીઝન પોલીસ સ્ટેશન દ્વારા કાર્યવાહી હાથ ધરવામાં આવી છે.