બનાસકાંઠા વીસી મંડળે રાજકોટ જિલ્લાના ગોંડલ તાલુકાના એક વીસીને પદ પરથી છૂટા કરવાના મામલે જિલ્લા કલેક્ટરને આવેદન પત્ર પાઠવી રજૂઆત કરી છે. મંડળે આક્ષેપ કર્યો છે કે ખોટા વીડિયો વાયરલ કરીને વીસીઓને નુકસાન પહોંચાડનારા તત્વો સામે કાર્યવાહી અને વીસીઓના રક્ષણની માંગ કરવામાં આવી છે. રજૂઆત મુજબ, 18 તારીખે ગોંડલ તાલુકાના સુલતાનપુરા ગામના એક વીસીને તાત્કાલિક છૂટા કરવામાં આવ્યા હતા. તેઓ ગુજરાત સરકારની કૃષિ સહાય યોજના અંતર્ગત ખેડૂતોના ફોર્મ ભરવાની કામગીરી કરી રહ્યા હતા. સર્વર ડાઉન હોવાને કારણે વીસી રાત્રે પણ કામ કરતા હતા. આ વીસીના ગામમાં લગભગ 2700 ખાતા છે અને 15 દિવસમાં કામ પૂર્ણ કરવાનું હોય છે. આ કામગીરી સમયસર પૂરી કરવા માટે, વીસીએ પોતાના ખર્ચે ખાનગી માણસો રાખી રાત્રે પણ કામ કરાવ્યું હતું. જોકે, કેટલાક તત્વોએ યુટ્યુબ પર ખોટા વીડિયો બનાવી વાયરલ કર્યા હતા. આ વીડિયોના આધારે ડીડીઓએ તાત્કાલિક ધોરણે તે વીસીને પદ પરથી દૂર કર્યા હતા. વીસી મંડળે જણાવ્યું કે વીસીને કોઈ નિશ્ચિત પગાર મળતો નથી, તેઓ ફક્ત કમિશન આધારિત કામ કરે છે. આવા સમયે રાજકીય કિન્નાખોરી કે અસામાજિક તત્વો દ્વારા ખોટા વીડિયો બનાવી વીસીઓને નુકસાન પહોંચાડવું શરમજનક છે. મંડળે આ કૃત્યની સખત નિંદા કરી છે. બનાસકાંઠાના તમામ વીસીઓએ રાત-દિવસ મહેનત કરીને 15 દિવસમાં ખેડૂતોના તમામ ફોર્મ ભરવાની ખાતરી આપી છે. તેમણે સરકારની કામગીરી સારી દેખાય તે માટે પ્રતિબદ્ધતા વ્યક્ત કરી છે. મંડળે માંગ કરી છે કે આવા રાજકીય કિન્નાખોરીવાળા કે અસામાજિક તત્વો સામે કાર્યવાહી કરવામાં આવે જેથી ગરીબ વીસીઓને નુકસાન ન થાય. આ અંગે બનાસકાંઠા જિલ્લા વીસી મંડળ પ્રમુખ રામસિંહ સોલંકીએ જણાવ્યું હતું કે, ગઈકાલે 18 તારીખે અમારા રાજકોટ જિલ્લાના ગોંડલ તાલુકાના સુલતાનપુરા ગામના એક વીસીને તાત્કાલિક વીસી પદ ઉપરથી છૂટો કરવામાં આવેલ છે. એનું કારણ એક જ હતું કે અત્યારે ગુજરાત સરકારની કૃષિ સહાય માટેની યોજના ચાલી રહી છે અને એમાં ખેડૂતોના બધા જ ખેડૂતોના ફોર્મ ભરવાના આવતા હોય છે અને ખેડૂતોના ફોર્મ ભરતા ભરતા અત્યારે લગભગ સર્વર પણ ડાઉન હોય છે. એટલે એ વીસી અત્યારે રાત્રે કામ કરતો હોય છે. રામસિંહ સોલંકીએ જણાવ્યું હતું કે, દિવસે કામ ન થતું હોય તો રાત્રે પણ કામ કરતો હોય છે. અને એના ગામની અંદર લગભગ 2700 ખાતા છે. એવી રીતે બધા જ ગામની અંદર લગભગ મોટા મોટા ખાતા હોય છે, વધારે ખાતા હોય છે અને ખેડૂતોનું કામ અમારે 15 દિવસની અંદર પૂર્ણ કરવાનું હોય છે. એટલે એણે પોતાના પ્રાઇવેટ માણસો બેસાડી, એને પગાર આપી, એ પોતે પગાર આપી અને માણસો બેસાડીને કામ રાત્રે પૂરી કરાવે છે. પરંતુ આવા સમયે સરકાર જે સારું કામગીરી કરતી હોય છે અને સરકાર ખેડૂતોને લાભ આપતી હોય છે, એવા સમયે સરકાર વિરોધી તત્વો કે જે ફક્ત ને ફક્ત યુટ્યુબરો બનવા માટે. રામસિંહ સોલંકીએ વધુમાં જણાવ્યું હતું કે, પોતાનું પ્રતિષ્ઠા વધારવા માટે, યુટ્યુબ બનાવી બનાવીને ખોટા વિડીયો વાયરલ કરતા હોય છે. અને એમાંની અંદર અમારા એક વીસીનો ભોગ લેવાયો છે. એણે અમારા વીસીનો ખોટો વીડિયો વાયરલ કર્યો અને તાત્કાલિક ડીડીઓ સાહેબે એ વીડિયો આધારે એ ભાઈને છૂટો કરવામાં આવ્યો છે. તો આવું ન થાય અને એ ગરીબ વીસીને કોઈ પગાર મળતો નથી, એને ફક્ત ને ફક્ત કમિશન ઉપર આધારિત હોય છે. તો એમ છતાંય પણ જો આ લોકો આવી રીતે રાજકીય, પોતાના રાજકીય કિન્નાખોરીથી કોઈ વીસીના પેટ ઉપર પાટું મારતા હોય, તો આ એક અમે આ એને શરમજનક બાબત કહેવાય અને આ કૃત્યને અમે વખોડી કાઢીએ છીએ. રજૂઆત અમે એટલી કરવા આવ્યા છીએ કે અત્યારે જે કામગીરી થાય છે, અમે કરીએ જ છીએ. બધા જ વીસી રાત-દિવસ મહેનત કરે છે. અને સરકારની કામગીરી સારી દેખાય એ માટે અમે રાત્રે પણ અમે આનું કામગીરી પૂર્ણ ગમે તેમ કરીને અમે 15 દિવસમાં બધા જ ખેડૂતોના ફોર્મ અમે ભરી આપવા માટે સંમત છીએ. બધા જ વીસી રાત-દિવસ મહેનત કરશું અને કામગીરી અમે કરશું. પરંતુ આવા જ કોઈ રાજકીય કિન્નાખોરી વાળા, કોઈ અસામાજિક તત્વો અને રાજકીય વગ ધરાવવા માટે પોતાના સરકાર વિરોધી કૃત્યો કરતા હોય છે જેના લીધે આવા અમારા ગરીબ વીસીને નુકસાન થતું હોય છે.