– રાહુલ ગાંધીએ લોકસભામાં એપસ્ટીન ફાઇલનો ઉલ્લેખ કરતા હોબાળો
– મોદી પર અમેરિકા સાથે ડીલ કરવા દબાણ, અદાણીને અમેરિકાના કેસમાં સમન્સ છતા 18 મહિનાથી સરકારે જવાબ ન આપ્યો : રાહુલ
નવી દિલ્હી : લોકસભામાં વિપક્ષના નેતા રાહુલ ગાંધીએ અમેરિકા સાથેની ટ્રેડ ડીલ અને અદાણીને સમન્સ તેમજ એપસ્ટીન ફાઇલ મુદ્દે કેન્દ્ર સરકારને ઘેરી હતી. સંસદમાં કેન્દ્રીય બજેટ પર ચર્ચામાં ભાગ લેતી વખતે રાહુલ ગાંધીએ કહ્યું હતું કે કેન્દ્ર સરકારે અમેરિકા સાથેની ટ્રેડ ડીલમાં ભારત માતાને વેચી નાખ્યા છે. આ ટ્રેડ ડીલ હોલ્સેલ સરેન્ડર છે, ભારતની એનર્જી સિક્યોરિટીને અમેરિકાને સોંપી દેવામાં આવી છે સાથે જ ભારતના ખેડૂતોના હિતો સાથે બાંધછોડ કરવામાં આવી છે. દબાણ વગર કોઇ પણ વડાપ્રધાન આવી ડીલ માટે સંમત ના થાય.