કુદરતી સૌંદર્ય અને વન્યજીવોથી ભરપૂર એવા ડાંગ જિલ્લામાં માનવ અને વન્યજીવ વચ્ચેના મિલનની અનોખી ઘટના સામે આવી છે. ડાંગના ભેંસકાતરી ગામ નજીકથી દીપડીનું એક માસૂમ બચ્ચું મળી આવતા સમગ્ર પંથકમાં ચકચાર મચી ગઈ છે. આ ઘટનાએ સ્થાનિક ગ્રામજનોમાં કુતૂહલ અને થોડો ભય પણ જન્માવ્યો છે. ભેંસકાતરી ગામની સીમમાં જ્યારે ગ્રામજનો પોતાની દૈનિક કામગીરીમાં વ્યસ્ત હતા, ત્યારે અચાનક આ નાનકડું દીપડીનું બચ્ચું એકલું અટૂલું જોવા મળ્યું હતું.

ગ્રામજનોએ વન વિભાગને જાણ કરી

ગ્રામજનોએ સમયસૂચકતા વાપરી તુરંત જ વન વિભાગને આ અંગે જાણ કરી હતી. સંદેશ મળતાની સાથે જ વન વિભાગની રેંજ ટીમ ઘટનાસ્થળે દોડી આવી હતી અને ખૂબ જ સાવચેતીપૂર્વક બચ્ચાનું રેસ્ક્યુ કરી તેને સુરક્ષિત રીતે પોતાના કબજામાં લીધું હતું. વન્યજીવ નિષ્ણાતોના મતે, માદા દીપડી ઘણીવાર શિકારની શોધમાં પોતાના બચ્ચાને સુરક્ષિત સ્થાને મૂકીને જતી હોય છે. બચ્ચું એકલું પડી જતાં તે જોખમમાં મુકાઈ શકે છે.

વન વિભાગ દ્વારા માતાની શોધખોળ શરૂ

આ બાબતને ધ્યાનમાં રાખીને વન વિભાગ દ્વારા માતા દીપડીની શોધખોળ તેજ કરવામાં આવી છે. વન વિભાગનો મુખ્ય ઉદ્દેશ્ય બચ્ચાને તેની માતા સાથે પુનઃમિલન કરાવી, બંનેને જંગલમાં સુરક્ષિત રીતે છોડવાનો છે. આ ઘટનાને પગલે વન વિભાગે સ્થાનિક લોકોને સતર્ક રહેવા અપીલ કરી છે. ખાસ કરીને રાત્રિના સમયે ખેતરમાં જતી વખતે સાવચેતી રાખવા અને વન્યજીવો સાથે છેડછાડ ન કરવા સૂચના આપવામાં આવી છે.

ગુજરાતના વધુ સમાચાર વાંચવા માટે ક્લિક કરો