નાણાકીય વર્ષ પૂર્ણ થવાને ગણતરીના મહિના બાકી છે ત્યારે કોર્પોરેશન દ્વારા હવે માસ જપ્તી સાથે વેરા વસુલાતની ઝુંબેશ હાથ ધરી છે. આજે એક જ દિવસમાં 115 કરદાતાઓ દ્વારા 42.52 લાખનો વેરો ભરપાઈ કરવામાં આવ્યો છે. ગત વર્ષોની તુલનામાં આ વર્ષે આવકમાં વધારો થયો છે. પરંતુ ઘરવેરા વસુલાતમાં પણ અંત સમયે જ જાગે છે અને દોડધામ કરે છે. ઘરવેરા વસુલાત માટે ઘરવેરા ઉપરાંત રિકવરીની ટીમની પણ રચના કરવામાં આવી હોવા છતાં માસ જપ્તી સહિતની કામગીરી માટે ઘરવેરા સિવાયના અન્ય વિભાગોને પણ વસુલાતની કામગીરી સોંપવામાં આવે છે. તા.19ના રોજ કુલ 115 કરદાતાઓ દ્વારા કુલ રૂ.42.52 લાખનો એક જ દિવસમાં વેરો ભરપાઈ કરવામાં આવતાં મહાનગરપાલિકાની મિલ્કત વેરાની ચાલુ નાણાકીય વર્ષની કુલ આવક રૂ.142.70 કરોડ થયેલ છે. માસ જપ્તીના પગલે મહાનગપાલિકાની આવકમાં દિન પ્રતિદિન વધારો થઈ રહ્યો છે. તા.10 નવેમ્બરથી શરૂ કરેલ માસ જપ્તીમાં અત્યાર સુધીમાં કુલ 522 મિલકતોને સીલ કરવામાં આવેલ છે. બાકી વેરાની રકમ ભરપાઈ નહીં કરનારની મિલકતને સીલ કરાશે. 10 નવેમ્બરથી તા.19 સુઘીના 9 દિવસોમાં કુલ 1037 કરદાતાઓ દ્વારા કુલ 1.95 કરોડનો વેરો ભરપાઈ કર્યો છે.