આદિજાતિ વિકાસ વિભાગ દ્વારા મુખ્યમંત્રી બોર્ડર વિલેજ સર્વાંગી ઉત્કર્ષ યોજના હેઠળ રાજ્યના સરહદી અને અંતરિયાળ આદિવાસી વિસ્તારોના વિકાસને વેગ આપવા માટે એક મહત્ત્વપૂર્ણ પગલું ભરવામાં આવ્યું છે. આ યોજનાના ભાગરૂપે, આદિવાસી વસ્તી ધરાવતા 14 જિલ્લાઓમાં રહેતા લોકોને શહેરી સુવિધાઓ સાથે જોડવા માટે નવી બસોનો પ્રારંભ કરવામાં આવ્યો છે. તાજેતરમાં પ્રધાનમંત્રીના હસ્તે 250થી વધુ નવીન બસોને લીલી ઝંડી આપીને રાજ્યની સેવામાં સમર્પિત કરાઇ હતી. આ બસો ખાસ કરી તે ગામડાઓ પર ધ્યાન કેન્દ્રિત કરશે. જ્યાં પરિવહનના સાધનોની કાયમી અછત છે. આ બસો આદિવાસી વિદ્યાર્થીઓને શિક્ષણ સંસ્થાઓ સુધી પહોંચવામાં અને સ્થાનિક લોકોને આરોગ્ય સેવાઓ તથા બજાર સુધી સરળતાથી મુસાફરી કરવામાં મદદ કરશે. લુણાવાડા બસ સ્ટેશન ખાતે જિલ્લા પંચાયત પ્રમુખ બાબુભાઈ પટેલ, ધારાસભ્ય કુબેરભાઈ ડીંડોર, મહીસાગર જિલ્લા ભાજપા પ્રમુખ દશરથભાઈ, લુણાવાડા ડેપો મેનેજર સહિતે લીલી ઝંડી આપી પ્રસ્થાન કરાવી હતી. આ પહેલ આદિવાસી વિસ્તારોમાં શિક્ષણ, આરોગ્ય અને રોજગારની તકોને વેગ આપશે.