ગાંધીનગરથી પોલીસ મહાનિદેશક તથા મુખ્ય પોલીસ અધિકારી દ્વારા મળેલ ખાસ સૂચના મુજબ રાજ્યભરમાં રાષ્ટ્રવિરોધી પ્રવૃત્તિઓમાં સામેલ આરોપીઓની ત્વરિત ચકાસણી કરવાની પ્રક્રિયા તેજ બની છે. આ અનુસંધાને તાપી જિલ્લાના પોલીસ અધિક્ષક જે.એન. દેસાઈના માર્ગદર્શન હેઠળ તાપી જિલ્લામાં તમામ પોલીસ મથકમાં અધિકારીઓને સઘન ચેકિંગ અભિયાન હાથ ધરાયું છે. તાપીમાં સૂચના મુજબ છેલ્લા 30 વર્ષ દરમિયાન તાપી જિલ્લામાં રાષ્ટ્ર સુરક્ષા સાથે સંબંધિત વિવિધ ગંભીર ગુનાઓ હેઠળ દાખલ થયેલા તમામ કેસોનું પુનર્મૂલ્યાંકન કરવામાં આવી રહ્યું છે. તેમાં હથિયારધારા, એનડીપીએસ એક્ટ, એક્સપ્લોઝીવ એક્ટ, બનાવટી ચલણી નોટ, ટાડા–પોટા– મકોકા–UAPA જેવા ગંભીર પ્રકરણો તથા પેટ્રોલિયમ ધારાના કેસોનો સમાવેશ થાય છે. તમામ કેસોમાં કુલ 107 આરોપીને શોધી તેમની ચકાસણી કરવાનો દાયિત્વ તાપી પોલીસને સોંપાયો છે. અત્યાર સુધી જિલ્લામાંથી 72 આરોપીની તપાસ પૂર્ણ કરી તેમની ડોઝિયર્સ તૈયાર કરાયું છે, જ્યારે બાકીના આરોપીની ચેકિંગ પ્રક્રિયા ઝડપથી ચાલુ છે. તમામ આરોપીઓના રહેઠાણ, હાલની ગતિવિધિઓ, સામાજિક મેળાપ અને સંભવિત શંકાસ્પદ જોડાણોની વિશેષ તપાસ કરવામાં આવી રહી છે. આ અભિયાનનો મુખ્ય હેતુ જિલ્લામાં કાયદો અને ક્રમ મજબૂત રાખવો અને કોઈપણ પ્રકારની રાષ્ટ્રવિરોધી પ્રવૃત્તિઓને મૂળેથી જ અટકાવવી છે. જિલ્લા પોલીસ મથક દ્વારા તમામ પોલીસ સ્ટેશનોને સતર્ક રહેવા તથા ગુનાહિત પૃષ્ઠભૂમિવાળા તત્વો પર સતત નજર રાખવા ખાસ સૂચના આપી છે. સુરક્ષા એજન્સી દ્વારા ચાલુ ડ્રાઇવને કારણે જિલ્લામાં ચકાસણી તથા પેટ્રોલિંગ વધારાયુ છે. તાપી પોલીસનું કહેવું છે કે આવી કાર્યવાહીની કારણે ભવિષ્યમાં રાષ્ટ્રવિરોધી, ગંભીર ગુનાહિત પ્રવૃત્તિ રોકવામાં મદદ મળશે.