ભરૂચ જિલ્લામાં છેલ્લા બે દિવસથી ઠંડીનો પ્રભાવ અનુભવાઈ રહ્યો છે. આજે સવારે લઘુત્તમ તાપમાન 18 ડિગ્રી સેલ્સિયસ નોંધાયો હતો, જેના કારણે વહેલી સવારે અને મોડી રાત્રે ઠંડીનું પ્રમાણ વધ્યું હતું. ઠંડીના કારણે શાળાએ જતા વિદ્યાર્થીઓ ગરમ કપડાં પહેરીને બહાર નીકળતા જોવા મળ્યા હતા. જોકે, બપોરના સમયે ઠંડીનું પ્રમાણ ઘટતા વાતાવરણ સામાન્ય બન્યું હતું. હવામાન વિભાગે આગામી ચાર દિવસ માટે આગાહી કરી છે કે મહત્તમ તાપમાન વધીને 32 ડિગ્રી સેલ્સિયસ સુધી પહોંચી શકે છે. બીજી તરફ, વધતી પવન ગતિને ધ્યાનમાં રાખીને કૃષિ વિભાગે ખેડૂતોને સલાહ આપી છે કે ખેતી પાકમાં દવાનો છંટકાવ પવનની ગતિ ઓછી થાય ત્યારે જ કરવો, જેથી દવાનો અસરકારક ઉપયોગ થઈ શકે.