અમદાવાદ શહેરના ઓઢવ વિસ્તારમાં આવેલી સોનીની ચાલી ચાર રસ્તા નજીક મોહમ્મદ કસાઈની ચાલીમાં જન્માષ્ટમીની રાત્રે જૂથ અથડામણની ઘટના સામે આવી છે. જન્માષ્ટમીના પાવન પર્વ નિમિત્તે ફાળો ઉઘરાવવા જેવી બાબતે એક જ ચાલીમાં રહેતા બે જૂથો વચ્ચે અચાનક ઉગ્ર તકરાર થઈ હતી. તહેવારની રાત્રે સરેઆમ બનેલી આ ઘટનાથી સમગ્ર ચાલી અને આસપાસના વિસ્તારમાં થોડા સમય માટે અફરાતફરી અને તંગદિલીનો માહોલ સર્જાયો હતો.

તકરાર ઉગ્ર બનતાં લાકડીઓ વડે હુમલો, વિસ્તારમાં ફફડાટ

ફાળો એકઠો કરવા બાબતે શરૂ થયેલી સામાન્ય બોલાચાલીએ જોતજોતામાં હિંસક સ્વરૂપ ધારણ કરી લીધું હતું. આ મામલે બંને પક્ષના લોકો મોટી સંખ્યામાં સામસામે આવી ગયા હતા અને ઉશ્કેરાઈને એકબીજા પર લાકડીઓ વડે હુમલો કરી દીધો હતો. જાહેરમાં લાકડીઓ ઊછળતાં અને મારપીટના દ્રશ્યો સર્જાતાં સ્થાનિક રહીશોમાં ભારે ફફડાટ વ્યાપી ગયો હતો. પરિસ્થિતિ વણસતી જોઈને સ્થાનિકોએ તુરંત જ આ અંગે પોલીસ કંટ્રોલ રૂમને જાણ કરી હતી.

ઓઢવ પોલીસે બંને પક્ષે ક્રોસ ફરિયાદ નોંધી 4 આરોપીઓને ઝડપ્યા

ઘટનાની જાણ થતાં જ ઓઢવ પોલીસ સ્ટેશનનો કાફલો તાત્કાલિક સ્થળ પર દોડી આવ્યો હતો અને વાતાવરણ શાંત પાડી પરિસ્થિતિ કાબૂમાં લીધી હતી. આ સમગ્ર ઘટનામાં ઓઢવ પોલીસે કાયદાકીય શિકંજો કસતાં બંને પક્ષની ફરિયાદોના આધારે ક્રોસ ફરિયાદ નોંધી છે. પોલીસે કુલ 8 ઈસમો વિરુદ્ધ ગુનો દાખલ કરીને 4 આરોપીઓની સ્થળ પરથી જ ધરપકડ કરી લીધી છે, જ્યારે અન્ય સંકળાયેલા આરોપીઓને પકડી પાડવા કાયદેસરની તપાસ તેજ કરી છે.

આ પણ વાંચો : Sabarkanthaમાં બટાકા પકવતા ખેડૂતોનો ખાનગી કંપનીઓ સામે હોબાળો, 4 કડક માંગણીઓ સાથે અલ્ટીમેટમ…